Panagaskaw

[Nabulod laeng ti ladawan a naaramat iti daniw]


Nalabit, naliputantayo
Kadagiti sinurat ti aginaldaw
A pasamak ti biag a naipempen
Iti panunot ti kinaubing, wenno 
Babaen ti legal a dokumento
Ti makapnek a tatak ti selio
Ti kinainosente, wenno ti enerhia
Ken anges a manglikmut
Kadagiti nadaeg a pasdek
Ken museo, ngem agserbi
Dagitoy a banag a mangipalab-og
Ken mangpasakit kadatayo
Iti inaldaw ta nailimedda
Ket nganngani nagbalin a sibibiag
A saksi a mangipadto ti kinaawanan
Gasat --banag a tubeng
Iti pagimbagan ti panawen.

Ket dagiti asin maipempenda
Iti kamalig ti kinaawan lung-aw,
Ta di managsakbay dagiti mangud-udir
Ti nabalitokan nga agdama a tiempo;
Ken ti naseggedan a lampara
Nga adda linongna iti rabaw ti lamisaan --
Agandap iti rabii ket paltuadenna
Ti agipug-aw iti nagduduma nga espiritu.



PANAGASKAW
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.by.rrr.o7.2o12.maui