Kurtina

[Nabulod ti ladawan a naaramat]


ipagarupko no nalpasen
agulimekak kad' lattan
ti apagapaman, kudisak
kadi ti lagipko iti lansa
a kas ti maipigket
nga insekto iti sarming?

ngem, nalabit a kasta
ti mapasamak gapu ta 
mariknak nga awan agayat kaniak;
diak payen masinunuo no agang-angesak,
wenno no nalamiisakon a bangkay,
diakon marikna ti saem.

diak kayat ania man a banag
bay-ak a mekmeken ti alipugpog
dagiti ruot, bay-ak nga umagibasda
kas iti nagango a bulong ti kayo
nga agsubli iti kinaubingko;
mapespes a kasla duog a tawen
dagiti amarillo a tabako
ti mabalasik a ramay.

agmalmalem a mingmingmingak
ti kurtina a nangabbong iti amin
a labes ti makitak, kasla agbirbirok
iti biddut ti rabii kadagiti
nagpanawan a tugot.

kayatko ti agrebelde tapno
iwalinko ti kurtina a nangkullaap
ti matak ken nawayaak 
a bumallasiw iti kasumbangir
ti lagipko, ngem pawilannak ti bagik.

kalpasanna, ania ti maganabko?

siuulimekak kad' lattan a mangsiim
ti panangitalaw ti napeklan a birkog
ti imahe iti simbaan ket alaenna
ti iskala sana kalkuluen 
ti panangtumekna babaen 
dagiti narugit a ramayna?

iti nalaus a panangderekrarna
ti pannakakupin ti kurtina bayat 
nga ur-urayenna ti panagapekto
ti pammatina iti pangay-ayo
ti panagabanse ti imahe, mautoyan
ti sapatosna gapu ti bannogna
a nagna iti kalsada, taliawek kadi lattan
ti direksion a pagsubliak?



KURTINA
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
[cr]o9.12.2o12.maui