Tawid

[Nabulod ti ladawan a naaramat iti daniw manipud ken Jeffrey Cervantes: Woodcarving, Illustration, Photography and many more]

Nagabutak iti daga
Nagsayasay dara

Saan a malipatan
Inosente a nagpukaw.

llik a pakabigbigan
Kinaasino ti arisadsad
Nagtaudan a nagdaliasat sadiay-
Nagsala, nagdaydayawda.

Nakitak nakersang a dakulap
Ti imingan a lalaki
A nagtrabaho iti kataltalonan,
Nautoyan dagiti matana.

Nakitak nabaked ken dalumpinas
A babai, adda kenkuana ti bukodko a lua;
Ginuyodna ti anakna iti sibayna, nagrupanget
Iti suli ti bibigna ti saanna a pannakapnek.

Nakitak dagiti tao a naparaburan ti dayaw,
Tan-ok ken kinangayed; kas da la danum 
A nagayus a nagturong iti baro a daga gapu
Ti pannakawatakwatak iti pannakapadisida.

Nakitak kinataok nga iti naminsan naikkat
Ti tawid gapu iti panangsuppiat ti pammati
Ket matikawak nga awan masnop a direksion,
Gapuna a naadalanak no apay a mabuteng
Ti maysa a baket iti gurruod ken kimat.

Ilik a napnoan kadagiti berde a tanap,
Kukuam ti lawag ti init,
Ngem mariknak ti kinadarang iti kaunggak.

Nagabutak ti dayta a daga
Ket mailadawak ti kinataok a nagna
A nagturong iti kros ti turod
Tapno sapulek ti lugar a paginanaan.

TAWID

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

www.samiwengkenayatnirudy.blogspot.com

cr.o8.2o12.maui