O Ayat

[Nabulod laeng ti ladawan a naaramat]



Asino ti mangkompas
nga agkanta ti kinaagnanayon
a melodia no datayo ket siuulimek
ken aggemgemgem dagiti ngipenna?

Asino ti mangted ti lawag
ken pannakakita ti bulsek
a lubong no dagiti imak
dinaka marikna ken masagid?

Sika ti tiempo, dagiti aldawko
ken tawen iti saklolo ti agarubos
a darat iti agpitik a baso ti pagorasan.

Ladingit ti pakdaar ti sipnget
ken natayengteng a maris 
nalabbaga ti yula ti alipugpog
iti labes dagiti di makita a parsua;

O ayat, ti ayat kadi
ti maudi a balikas?
No agrasuk ti dara
ket mapisang ti lapayag
 iti napigsa a timek--
sika kadi ti akin-nakem?



O AYAT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com