Ta Siak, Awananak

[Nabulod ti ladawan a naaramat]



Saanak a tagibassiten,
isardengmon ti agbirok.
Isardengmo metten
ti agkapkap kaniak
ta siak, awananak.

Dinak kadi patien?
Denggem, uray ti bibigko
napukawen sam-it agekko,
awan payen uray sentimo
a karga ti bulsa ti pantalonko
ta amin a naikapet kaniak--
lussok.

Mariknak a kaslaak nalislis
a kawes a naidatay iti lubong--
saan laeng ti bibig,
wenno bulsak, iti sadino
a paset ti bagik

Sika? Nalabit, nakainumka.
Maibasingbasing iti bartekna.
Kaniak, adda pay nabati
a dara nga agsaysay iti pusok,
ngem siwawaya ti lumot
dagiti narapis nga urat iti ulok...

Damagem no ania 
ti agtalinaed kaniak,
no ania ti ramen ti panunot
ken imahinasionko?

Ngem sungbatko: awan karbengam
a mangbukitkit linaon ti pusok,
wenno mandaren lattan nga agtignay 
ta amin dagitoy nagkapet 
ken naikamang ibilangko
a sagrado-- diak ilibak.

Sika, tartarawidwidam ida
nga awan agaun
a kanta iti pusona.



TA SIAK, AWANANAK
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.rrr.11.2o12.maui