Rupa

[Nabulod laeng ti ladawan a naaramat iti daniw]

Rupa

Ni Rudy Ram. Rumbaoa

[nasurat.1.31.2013.maui]

Napintas 'toy aruatek
Ken komportable
A naabel iti dutdot ti karnero, 

Daytoy Diosko
Addaan iti pagtaengan, ngem ti amak-
Awanan.

'Toy bosesko aguni
Di magaraw kas iti panagaskaw
A maikontar iti tunggal segundo,

Ket ti kalmado a pingpingko
Saanto nga agdisso kenkuana
Ti gemgem ti asinoman nga aginlalaing.

Awan wasay ti amak
Ti wasay ti wasayko
Ket adda iti rupak,

Ti ay-ayatek, makaay-ayo
Nagaruat kas maysa a dayag
Isut' mamagpitk iti pusok.

Ti Diosko 
Addaan iti ina a saan
A kas iti amak nga awanan iti ina,

Ti naimbag a sursuro saan a maibagay
Iti panagibtur ti rupak, kasapulanna
Ti makaay-ayo ken kinatakneng ti tao.

Aglanglanga a maladaga ti rupa ti Diosko
A makaguyugoy, ngem nataengan ti rupa
Ti amak a nakapuyen gapu iti edad,

Nasulnot a ngipen iti ngiwat
Mata ken dila, saan a kasapulan ti rupak
A pagbayad kadagiti utang-

Ngem kasapulak ketdi ti rupa
Nga aglanglanga a kas kaniak, ta saanko
A kaing-ingas ti rupak.

Ti Diosko, saanna a kasapulan
Ti rupak
Ngem ti amak, adda kenkuana ti rupak-

Siak, saan.

[C]by.rudy.ram.rumbaoa.enero.2013]