Iti Tawataw a Pagtaengan

[Nabulod laeng ti ladawan a naaramat iti daniw]


Iti sukog ti rabii makitak
panangriparmo, saan a klaro
ngem kas ti nakuridemdem 
a lawag ti bulan kalpasan 
ti ilelennek ti init ti panagkitam.

Ket ti panagadu dagiti kontinente
a mangdayaw ti pintasmo, managbabain 
ti maikari a tiempo ti pannakaisab-it 
dagiti balikas iti labes ti garangugong 
ken nalamuyot nga arimbasaen a lasag, 
mapasaran ni patay iti maputipotan
kadagiti agsisinggalut a di pay 
nasagaysay a buok, ti sungbat
aggapu iti agballa a narunaw 
a batbato nga ipugso ti bulkan, 
kas met ti niebe iti nagbaetan 
ti mangsulisog nga aplaya; masalbar 
ti panaglayag dagiti barko, ti pigar 
ti puraw a lames ti bulongnas, 
ti aniniwan dagiti argarlubo a kayo
asidegak iti tawataw a pagtaengan
bayat a makipagnaedak kenka,
iti nagbaetan ti agpideg a kurimatmatmo
ket mainspiraran ti bulsek, ti marmarpanaap --

awananak iti pagtaengan, ti laeng nalimpio
ken nawada nga ayat ti saksik iti desperado
a kinaulimek dagiti balikas 
ti maysa a libro ti pagsasao...



ITI TAWATAW A PAGTAENGAN
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
cr.by.rrr.o7.2o13.maui