 |
| [Nabulod laeng ti ladawan a naaramat iti daniw] |
Trahedia Iti Kunia Road
ni Rudy Ram. Rumbaoa
Naiparakupok ti dara a nangmansa
Iti nadalus a kalsada ket ti natarnaw
Nga arapaap, linangeb ti sipnget
Nagbalin nga umel dagiti bibig
Ta saandan a makabalikas.
Nagbalin a bulsek dagiti mata
Ket didan makita ti akin-aramid
idinto nga agtukiad ti ima a mangitudo
No asino't akimbasol iti panagdinnungpar
Ti dua a lugan a puon ti pannakaimansayag
Gapu't pannakairisang ti biag.
Awan ta awan ti sumngaw a balikas
Iti bibig dagiti napateg a napanawan,
Kayatda man a yikkis ti rurodda
Ngem agbeddal ti dila; piman dida
Temtem ti ladingit, lua ken dung-aw
Di agngudo a panangsapul ti puso
Iti hustisia gapu't saem a naimarka
Iti panunot a nangkettel ti masakbayanda.
Ket aglabas ken aglabasto latta dagiti aldaw-
Adu latta dagiti saludsod kenka Kunia Road
A sikat' makasungbat,
Pudno a butburtia ken datdatlagka
Kadagiti agdaliasat:
No kuan, umapitka't biag a dina oras.
-copyright by rudy ram. rumbaoa
dagiti koleksion a daniw, sarita, kanta, ken dadduma pay
No comments:
Post a Comment