 |
| [Nabulod ti ala a ladawan a naaramat] |
Ti gasat arigna ul-ulila,
agwalangwalang
kanayon a maidaleb;
malapgis ti lasag
maiparakupok ti dara
kadagiti nadalus a kalsada,
sumarut iti kudil ti makasinit
A darang ti init, nakana
a leddaang ti mapamemmem
a bibig ta dina mayebkas,
maipeksa dagiti balikas
nga im-impenen ti kaunggan--
uray no kasta, agpakumbaba
ket mamati nga adda
iti puso ti pakaipalnaadan
dagiti pagilasinan nga ur-urayen.
Uray pinarmek ti ilado a tudo
dagiti raep, mayarig latta
a banang-es, wenno ungor
ti lugan ti pinagsina a tadem
ti kimat dagiti saripda--
nupay Isu ti nangbangon ti ili,
mamati a kabaelanna a pagbalinen
nga arak ti lua ken dagiti bato
iti tinapay. Napanaas kas man
tungpa a maipanalpiit iti rupa
dagiti adu a rigat ti panagtrabaho
gapu ti in-inut nga awan bunga
dagiti aldaw ti di nasayaat
a buya iti aglawlaw, nupay ti talek
iti amin nga addaan kababalin
a nailangitan ket maibilang latta
a nababa, agulimek ti pakapilawan
ti daradara a saka;
Iti kasta, kumaro ken lumawa
ti nana ti sugat ket inaldaw
a marikna ti ut-ot ket ti awaten
a bendision iti ngato, agbalin a napait--
ngem ditay' agsarimaddeng,
ditay agsuko tapno magun-od
ti maudi a balligi ken ayat...
DITAY' AGSUKO
[PANAGTAWATAW]
Rudy Ram. Rumbaoa
Dagiti Koleksin a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment