No Koma [Iti Daytoy Nga Aldaw a Pananglagip ti Panagtaom]

Adelindes Ramos Rumbaoa

No koma masagutanka
iti diamante tunggal agarubos
lua a siak ti puonna,

No koma masagutanka
iti kurindon tunggal maidalebak
yawatmot' ima tapno bumangonak,

No koma masagutanka
iti rubi tunggal masaktak
riknam a sika lat' makarikna,

No koma masagutanka
iti perlas gapu ti dungngo
ken ayat nga impariknam--

Adu koman kinabaknangmo, Ina,
ta mayarig kaaduda kas iti kalawa ti baybay
nga awan pagnguddoanna, wenno kangato
dagiti bantay a tumukno iti ruangan ti langit
a sadiay napno ti samiweng dagiti angheles
ken makipinnaris iti rimat dagiti bituen
ti naasi ken managayat unay a pusom;

Ngem awan ti perlas, awan rubi,
kurindon wenno diamantek nga isagutko
ket ammok nga ammom nga awananak
kadagitoy a banag ta siak ti nanumo--
ti laeng kinaasinom kaniak ken no asinoak kenka
ti maipagtangsitko ta awitkot' daram 
nga agtartaray kadagiti urat ket dinto malibeg 
ti siasinoman, ta siak, maysaak a namuli 
kadagiti nagkaadu nga araapapyo ken ama.

Ikawesko nga agnanayon ti kinadungngom.
Agbalin a taraonko iti inaldaw ti ayat
ken pammategmo a damok a naraman
nga insubom kaniak idi masirayak ti lawag-
Bendisionannaka koma nga agnanayon ti Dios.

Agyamanak unay kenka, Ina.

Ay-ayatenka. Naragsak ken nagasat
A pananglagip iti aldaw ti panagtaom!

NO KOMA [Iti Daytoy Nga Aldaw a Pananglagip ti Panagtaom]

[Ken ni Adelindes]

Rudy Ram. Rumbaoa

Dagiti Koleksion a Daniw, Sarita, Kanta ken Dadduma Pay

[c] 08.26.2013.maui

www.samiwengkenayatnirudy.blogspot.com