'Nia, Apay ken Sadino

[Nabulod laeng ti ladawan a naaramat iti daniw]

'Nia, Apay ken Sadino
Ni Rudy Ram. Rumbaoa
-Dagiti Koleksion a Daniw, Sarita, Kanta, ken Dadduma Pay



Sadino a balay ti pagnaedam ita nga agbibiagka?
Iti lugar a nagnaedak idi siak pay ti maladaga

'Nia a dalan ti turongem no oras ti ipapanaw?
Perdi ti kompas ket ulodek lattan ti sakak a magna

Ket 'nia ngarud ti kunam no baliksem ti panagpakada?
Awan ta kuna ti angin kaniak nga awan ti tiempok

Kadagiti napanawam sadino ti 'yanda itan?
Addada sadiay nga agkarkarag sakbay iti ilelennek ti init

Ket no planomto ti agsubli,'nia ti inka masarakan?
Agnaed ti diablo sadiay ngem awan ti bibiangna

'Nia ti makitam no talliawem ti likudam?
Birri iti sarming, makasinit ti darang ti init

Ket 'nia ti makitam no itangadmo ti rupam?
Isu met la darepdep sakbay a mapanak agidda...

Copyright.RRR.8.23.2013.Maui