 |
| [Nabulod laeng ti ala a ladawan a naaramat iti daniw] |
Awitko Latta
Ni Rudy Ram. Rumbaoa
Dagiti Koleksion a Daniw, Sarita, Kanta, ken Daddum Pay
Sumged latta
Iti lagip a kas iti kabara
Ti apuy a mangsinit iti kudil
Ken manglukais iti panunot
Ti naikupinen a napalabas-
Saan gayam a masebseban
Uray mamin-ano a mabukbokan
Iti pananglipat tapno mairugi manen
Ti baro a punganay...
Kunak no maysakan a pakasaritaan
Ken paset iti biagko
Ta nabayagen a nalamiisen
Dagiti apros ken arakupmo,
Ngem nagbiddutak;
Ad-adda gayam nga agbiagka
No kasta a gamdek a lipatenka...
Saan nga aglibak ti kinapudno
Ta napaneknekak babaen iti aramid
Ti kinataom iti kinaasinom;
Awitkonto latta ti naganmo
Ta daytoy ti mangipalagip
Iti agnanayon
No asinoak nga umuy-uyas
Kadagiti urat, ti dalan ti dara,
A mangipugso iti ayat-
Wen, siakto latta ti Siak
Ammok nga ammom dayta-
Ta maysaak kadagiti arban
Nga inaywanan ti pusom.
No comments:
Post a Comment