Kasano A Mariknam ti Aprosko?

[Emeterio Tungpalan Rumbaoa, Pebrero 14, 1910- Pebrero 26, 1996]

Kasano A Mariknam ti Aprosko?
[Ken ni Emeterio]
ni Rudy Ram. Rumbaoa
[nasurat.5.28.2013.maui]
 


Kasano a mariknam ti aprosko no adayoka kaniak?
Uray kadi no kunak a sagutanka iti nakakurkuranges
A daniw tapno ibuksilanna ti amin a linaon ti balikas,
Wenno mariknak ti nairut ken nabara nga arakupmo
Ket agpatak ti pannakaidingpil ti bibig iti pingping?


Ngem nupay kasta agsuratak gapu ta awaka't dennak.
Nakaad-adayoka iti panagkita dagiti matak, timbengen
Iti panangidadanes ti arte ti riknak. No namin-ano
A daras a siririing 'toy pusok iti pannakalagipko kenka
Ket agsublisubli ti alintataom ken agparang ti rupam.


Kunak: Kasano koma a mabalin ti kaaddak kenka
Iti dayta a wagas tapno maipadaak iti nasged
A tarigagay ti iliw ken segga? Nalabit, inton pumusayak...


Palubosannak ta gaw-atek dagiti parabur iti nalablabes
Ngem ti nakabangen uray agdama a sibabaludak iti naut-ot
A sugat wenno tagikuaennak ti nakana a liday, ta awan
Insawangmo nga ania a balikas ti inka panagsubli
A banag nga alisto unay ti panaglibas dagiti tiempo
Iti nagbabaetan, ket dagiti nabattaway nga aldaw


A pannakailiw, yegna laeng ti pannakaulila, ngem
Babaen iti nabiag a dungngo nga inkawesmo kaniak;
Taluntonek dagiti baro a dana ti masakbayak a kas
Iti panangdayas ti kaippasngay nga init dagiti orkidia-
Ta mamatiak nga agsarangtanto manen iti rupanrupa.


-copyright by. rudy ram. rumbaoa/5.2013/maui
  dagiti koleksion a daniw, sarita, kanta, ken dadduma pay