Filipinas

[Nabulod laeng ti ala a ladawan a naaramat iti daniw]

Filipinas
ni Rudy Ram. Rumbaoa
-Dagiti Koleksion a Daniw, Sarita, Kanta, ken Dadduma Pay
-nasurat.10.5.2013.maui



Bassitka, alisto a makabirok ti kuarto
A pagnaedan iti bukod a pagilian,
Ngem mayarigka iti gerret ti maysa
A tinapay iti rabaw ti lamisaan
A pagpiestaan ti sangalubongan...

Mayarigka pay iti bassit a metal 
A pagtakup a sukog de plato
Manipud iti kawes ti kalasag ket
Naimarka kenka dagiti puritak ti dara
Ken nasibugan iti napait a krimmistal
A tedted manipud iti asul a tangatang.
Nabaknang ti daga nga ik-ikutam ta di
Naarado iti nabayag a panawen, ngem
Agbannawagto ti init iti barukongmo
Ket ti raya salputenna dagiti nakudrep
A siudad ken sinanama a makitananto
Manen dagiti berde a minuyongan; ngem
Iti mata ti lubong, maysaka nga amarillo
A naranghita, wenno maris asul 
Wenno nalabaga a tuldok nga addaan
Iti angot ti agpapatay a kayo ti argarlubo...

Ti laeng ayatmo ti naindaklan a pudno
Ken kadagita dakulapmo, sika ket di mailupit,
Ket dagiti arapaapmo maysaka a pakasaritaan-
Dagiti matam maysaka a daga a pagleggaakan.

[copyright by rudy ram. rumbaoa]