PANAGBANIAGA [Panagtawataw]

[Nabulod laeng ti ala a ladawan a naaramat iti daniw: The Journey]

PANAGBANIAGA
[Panagtawataw]
Rudy Ram. Rumbaoa
-Dagiti Koleksion a Daniw, Sarita, Kanta, ken Dadduma Pay


Agbaniagaak kadagiti lugar
a diak pay napanan, kasarsaritak
ti bagik a kas man kasarsaritak ti billit,
wenno ti kaayan-ayat, wenno ti pinanawak nga ili,
ti bullalayaw wenno turod a kas man kasasaok
ti rinibu a banag-
ngem kinapudnona; awan.

Iti anatomia ti nakana a liday aglukat
A kas higante nga insiklopedia
Ken agrikep a di masinunuo a kas bulto
Tapno matakaw ti misterioso a kallugong,
Mairugi ti panagsusubang ngem ti rabii
Agtalinaed dagiti sikretona a nakamboran
Iti arak ken tubbog ti prutas ti panagsagaba
Ken babawi, ket dagiti dadduma agsala iti tango.

Aggunayak kadagiti kurba a pagnaan ti dara
Italmegko dagiti nagsarimaddeng a lalaem tapno
Mangngegda ti musika, rummuar ti tubbog ti bagi
Ket serkenna amin a bassit a lussok iti siudad, mangparnuay
Iti simple nga ayug a mangtiliw iti atension ti lapayag.

Agbaniagaak kadagiti lugar a diak pay napanan
Sadiay, awan ti nalawag a pagilasinan
Ken amin a balonko imetna ti nagkaadu a saludsod;

Ngem mabigbig ti pagdaliasatan babaen iti pagilasinan
Ti maysa nga ayamuom wenno maysa a kinabanglo,
Kas iti kudil ti ay-ayaten; mabigbig ti maris ti mata-
Ngem dinto pulos mabalingling wenno mapusipos.