Nakairuaman

[Nabulod ti ladawan a naaramat]


Nagbalinen a nakairuaman
masurat awanen pakaadalan
mapukaw bugas ken pakaibaisan
ti tunggal binatog no maminsan.

Pudno daytoyen ti intay' nakaugalian
no aniat' mapanunot igudugod ti plumam,
ditay' utoben maibinggas a balikas
saanen a kas idi ti masurat de-kalidad.

Agipaskiltayo iti internet, kumporme ditan;
kayatmo lang aglatak ti inka nagapuanan,
ngem aniat' serbida no di masukit kaunggan
ken di maawatan kayat ti author nga iladawan?

Ah, abisigen a naimbag ti pagbiddutan
pudno saan nga agrangrang apuy ti kayatna a silnagan;
no tubeng ti maysa a banag iti gagar a maibuksilan
ditoy in-inut a makeltay literatura ilokana a pagesman.

Imulagat ti mata, iwaras pagakita;
dimo apputen lapayag tapno nalawag panagdengngegna,
ta kas met iti panagsurat rebbengna nga adda iburayna
mangibati ti adal kadagiti naruay nga agbasbasa...



NAKAIRUAMAN
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com