Ridaw

[Nabulod laeng ti ladawan a naaramat iti daniw]

Ridaw
[Erotiko a Daniw]
ni Rudy Ram. Rumbaoa
-dagiti koleksion a daniw, sarita, kanta, ken dadduma pay

Pinalagipannak iti naminsan umar-arubayannak
Pinawilannak umasideg iti inaladan a bambantayam
Diak ipilit ti sumrek iti kinabukatot a wagas
Ta ibilangnak a gangannaet— mannanakawak

Pinalagipannak nga adu’t naggandat a sumrek
Dida nagballigi ta awan kadakuadat’ tulbek
Ngem no bilang palubosam, lumaemak
Lanaak ti tulbek tapno nagalgalis a sumrek

Inulitmo ket pinalagipannak pay a kunam
No ipilitkot’ sumrek adut’ pannubok a paglasatak
Ngem diak samiren no isut’ pagayatam
Natakneng nga iseserrek, napudno ‘toy gandat

Umuna nga apros iti seradura, agan-annadak
In-inutek nga ipuligos, dakulapek a naimbag
Ta uray kunam a nakakandado’t nabayag
Siak ti umuna a sumrek, siakto ti nagasat.

Kunam iti damo: adda mabati a marka iti pagserkan
Kunak nga insurnad: dika madanagan siak ‘tay natanang
Kunam nga inulit: dinak allilawen ket dika agsamsam
Kunak a silalailo: dinak pengdan ta kuak ti kinabaknang

Nagkinnarawata’t panunot, natiliwak balikas
Kasda la naamo a karnero nagkurnoda’t arpad
Nagalisto itan nga iyusong kakaisuna a tulbek
Awanen ti sawsawir urayko la nga ipennek!

*karaman iti libro nga ALIMPATOK, Antolohia Dagiti Erotiko a Daniw nga Ilokano,
panid 95, inedit da Roy V. Aragon, Mighty C. Rasing ken Ariel S. Tabag,
impablaak ti Saniata Publications 2012, immaldit iti Filipinas
ti Econofast Press