Seradora

[Nabulod laeng ti ladawan a naaramat iti daniw]

SERADORA
[Erotiko a daniw]
ni Rudy Ram. Rumbaoa
-Koleksion a Daniw, Sarita, Kanta, ken Dadduma Pay



Diakto sumrek iti wagas a kinabukatot
ta ammok a saanka a nakasagana
a mangitalek ti sikretom, ngem iparabawmo
ketdi dagiti dakulapmo iti lawlaw ti serador
ti pagtaengak, innayadem a puligosen,
sumiripka nga umuna kalpasanna, karawaem,
riknaem ti agangsaw a bara manipud iti uneg;

dika madanagan ta uray petpetmo ket dimo
ibbatan, diakto gamden nga aramiden kenka
ti sumrek tapno laeng agsamsamak.


Siertok nga adda ir-irut ken il-ilet ti pagserkan,
adda rikking ken rekkang ket mangibati
iti marka no makalaemak. Idawatko ketdi
nga ikalkalawam ti panangawatmo
tapno ti sakupek awan sawsawirko
a matagikuak ti kalikagumak a kinabaknang.


'Yunak ketdi nga idingpil ti bagik iti bagim
tapno mariknak ti bara nga agaun kenka
kalpasanna, denggekto ti apagapaman
a dalagudog 'ta barukongmo no addan
senial iti panangawat ken iseserrekko.


Ammok a diakto madanagan ta mabalinmo
nga ibaga kaniak no kaano ti ilalaemko
ta kageddananto ti ritmo iti panagkompasko.
Ket agingga a mangngegko ti naumbi a samiweng
iti yaanamongmo a kasla yar-arasaasmo,
tagikuaennakat' imahinasion iti aglawlaw.


Ket no nareggeten ti essem, pasgedek,
isilmutko ti apuy iti kumkumter a kudilmo
sakonto yarasaas kenka ti kaduogan 
a sonata a di pay nakanta. Ket no mariknakton 
a kasla mauyos ti pigsak iti sobra nga ut-ot 
ti bagi, bay-ankanton iti kaykayatmo 
a panangpuligos iti seradora.


In-inut nga aglumen dagiti nalailo a samiweng
agingga nga awanen ti sumngaw a boses
wenno mangngeg manipud iti nabantot
a panagpungtot dagiti piskel iti panagtrabahona
kalpasan nga awanen ti un-uni ti seradora ti ridaw
no malukayan a maluktan...