 |
| [Nabulod laeng ti ladawan a naaramat] |
Petalo ti Sabong
[Erotiko a Daniw]
Ni Rudy Ram. Rumbaoa
-Dagiti Koleksion a Daniw, Sarita, Kanta, ken Dadduma Pay
Innayadek a bukatan
petalo ti sabong
ket say-opek amin a banglo.
Aprosak ti nalamuyot a kudil
agingga a mangparnuay ti bara
a mangitunda ti pannakauram
ti lasagko, diakto sebseban ti agek
ngem denggekto ti ritmo
ti panagpitik 'ta pusom...
Makipagay-ayamak iti angin
ket akkubak ti bagim iti isem,
dagiti kari ken pantasia didanto
mangibati iti aniaman a tugot.
Batirekto ti sikreto dayta a banag
kas ti panangibuyat ti mangkukulam
ti arak, ket mariknakto ti panagburek
ti agtartaray a darak, tumpawakto
iti aglawlaw ti maipalais nga areng-eng.
Ket kamaudiananna, innayadek a sullatan
tunggal rekkang a pagserkan--
ta sisiak laeng ti pakaikarian
dayta petalo ti sabong a kababangloan!
[copyright bu rudy ram. rumbaoa]
No comments:
Post a Comment