Asino ti Mangipalnaad iti Kinatan-okna?

[Nabulod laeng ti ladawan a naaramat iti daniw]

Asino ti Mangipalnaad iti Kinatan-okna?
Ni Rudy Ram. Rumbaoa

Asino ti mangipalnaad iti kinatan-okna?
Ta Isu pinalikawkawanna ti globo ti apuy
Babaen iti di magaraw wenno magunggon
Nga espera, no sadino a ti bulan, ti lawag
Ken makasisirap a kinangayed ti init;
Iti beinte nga aldaw a pannakagun-od 
Ti panagwerretna. Kalpasanna, agsubli
A makiurnos kadagiti nainlangitan 
Ken di mailawlawag a bambanag iti law-ang.

Maiparangto ti dadduma a sikretona, ngem 
Agtalinaed a di maipalnaad dagiti dadduma.
Ket ti bagina maisaad a kas bagi ti lubong
Maymaysa ti tallopulo ket siam a paset,
Ket binulanbulan a batiren ken kiwarenna-
Ket maikkan iti gundaway dagiti nasayaat
Wenno dakes ti panagemna nga agaramid
Iti kaykayatda. Ngem segun iti pagayatan
Ti Namarsua kenkuana: "Maipaduyakyak
Iti amin a nagtagilanga wenno kadagiti ayup
Wenno iti amin nga agbibiag iti lubong
Ti kinasirib ken awan pumada a tan-okna!"

[copyright.by.rudy.ram.rumbaoa]
-dagiti koleksion a daniw, sarita, kanta, ken dadduma pay