Diak Koman Kayat Ti Agsurat

[Nabulod laeng ti ladawan a naaramat iti daniw]

Diak koman kayat ti agsurat iti daniw, 
mamatiak a saanto a mangted ti ragsak 

no di ket soledad...


Kayatko a masaen ti tinapay, wenno ilallay 
ti maladaga ket awitek ti bukod a kalgaw--

Nakurenren ti rupak ket dagiti dakulap 
nakersang iti amin a panawen ti panagani.

Nupay iwaneswes ti angin dagiti silaw ti poste 
iti daytoy a rabii, magnaak latta a sakasaka 
kadagiti naarado a pagtatalonan. Ti biag 
maarikap kas iti maysa a sugat, ket ti rabii 
a napno ti bituen, matnagda a kas balikas-- 

itdenna ti napait nga agsapa;

lumtuadda iti panunot ket kasda la danum
a mangdam-eg dagiti natikagan a kinelleng,
agpakada ngem umay ti sabali a bigat.

Agdawidaw ti basar iti makapleng a riaw
ti pusa, makapatigerger ti apros ti angin
iti panawen ti panagrururos, mangngeg
ti panagngerngernger ti dalluyon a mangsabuag
ti aplaya; ngem makasalibukag iti rikna ti angot
ti menta iti igid ti karayan, agdisso ti raya ti init
iti abaga a paginanaan ti naamo a billit
a nagkayabkab manipud iti vidrio ti tawa.

Ngem awan makapagsasaraip kadagiti nasinasina 
a balikas: no ti rabii a napno't misterio 
ket lapdanna ti panagtedted dagiti lua, wenno 
adda ibagasan ti nalabaga ken maris ube 
nga erbia wenno sabong a mapidut iti tengnga 
ti aldaw ta iduronna laeng a yadayo dagiti 
nasam-it a balikas kadagiti urat, awaten ti puso, 
mayula a rummuar iti bibig, makatikaw 
pannakaisawangna ta napait kalpasan a maramanan.

No ti sangapiraso a niebe a pekkel dagiti 
dakulapko ket inawnawko iti danum, 
ammok a matunaw kas ti panagtapaw 
ti bulong ti oliba, ngem diak panunoten 
a saanko a kabaelan nga iturong ti gasat-

Diak koman kayat ti agsurat kadagiti daniw, 
ngem ti pluma a petpet dagiti ramayko 
agtremulo iti panagpitik ti pusok-- 
gapuna a diakon makapagsubli iti naggapuak...



DIAK KOMAN KAYAT TI AGSURAT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
*copyright.enero.2014