Adda Sadiay ti Biag, Ragsak ken Ayat [Ken ni Emeterio]

Adda pay laeng piglat
Iti sugat ti inulilam 
A kalman nupay
Inwakniten ti pusok
Ti panes ta nalpasen
Daytoy a dinung-awak;

Ngem nasingaak iti
Pannakalagipko kenka,
Naggilap a nagrehistro
Iti panunot ti pakabuklam
Banag a nagsubli dagidi
Batonlagip a nabukel
Ngem dagus a napugasda 
Idi nasapulam ti dana
Ti ragsak a kaibatogam.

Nabayag daydin a tiempo.
Anasaaska itan iti aglawlawko
A kas iti angin a diak makita,
Wenno pul-oy nga umagibas--
Ket iti kinataok, nabatad
Ti karim a dinakto baybay-an
Nga agmaymaysa; ngem kasano
A maaprosak ita ti rupa,
Wenno idingpil 'toy agek
No nalamiisen ti pingping?

Patiek, addakanto latta
A kabinnuligko dagiti aramidek,
Agtalinaed a maitalimengka
Iti kaunggak a kas maysa
A naatap nga orkidia a kanayon
Ken binigat a sibogan tapno 
Mataraonan iti ayatko, maipasngay
Ti sabali a bigat a panagabante, 
Mawaknitan ti nanglangeb
A sipnget tapno tumpuar ti lawag
Ken agtultuloy nga angsek
Ti angin a kasilpo ti biag--

Nga uray kunam a dikan makita,
Ammok nga iti lubong nga ayanmo ita,
Adda sadiay ti biag, ragsak ken ayat!





ADDA SADIAY TI BIAG, RAGSAK KEN AYAT
[Ken ni Emeterio]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
Immuna a naipablaak iti FIL-AM Observer
[CR.by.RRR.o3.2oo8]
www.samiwengkenayatnirudy.blogspot.com