[Nabulod laeng ti ladawan a naaramat] |
Ni kaanoman saan nga agnanayon nga agindeg
dagiti tedted ti tudo, wenno agbati ti marakapas
nga aglabas nga ulep, wenno ipalubos bullalayaw
a masagid ta isu ti arko ti nalawa a tangatang.
Nupay kasta, saan a pumanaw ti dissuor
iti panawen ti panagrururos, wenno pilkuen
ti angin dagiti ruot nga adda iti nababa
a lugar a mangted ti saan a maibaga a rason.
Adu a dana ti turongen ti panagaksawtayo
iti salinong ti naabbongan a langit, ditoy
maipakita ti tao nga agbibiag, aggaraw,
mataraonan- masarakantayo dagiti rason, apay...
Dika koma mabannog nga agbaniaga iti adayo
ta babaen ti naannad a panangplano ti Namarsua
ti uniberso, kabaelantayo a sagiden uray pay
kararua dagiti sabong, ta napatpategtayo ngem isuda.
NAPATPATEGTAYO
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
No comments:
Post a Comment