Iti Sirok ti Sellag a Bulan

[Bukod nga ala a ladawan ti bulan]

Malaksid kada butter ken hydie
nga aso a kaduak, agmaymaysaak
iggemko ti sangabaso nga arak;
iti panangitangadko ti baso dinawatko
iti bulan a danggayannak nga aginum.

Naganninaw ti bulan a kaduak iti uneg
ti sangabaso nga arak, tallokami. 
Ti bulan, siak ken ti baso.

Kalpasanna, nagbanang-esak 
gapu ta saan a makainum ti bulan 
ket in-inut a kawaw ti aniniwanko 
kaniak nga awan man maibalikas;
nga awan man laeng maysa koma
a gayyem a kaduak, a makidanggay
iti panagmaymaysak, a makipagrikna
kaniak iti oras a panagsensennaayko.

Naragsakak koma met ti amin
a makitak iti aglawlawko; agtugaw
ken agkanta a kas iti panangdanggay
ti bulan kaniak. Ket no agsalaak,
ti mismo nga aniniwanko ti kasalak.

Ngem gapu ta saanak pay a nabartek,
ti bagik ti kasarsaritak, ket ti arak
iti baso ti mangpabara ti riknak. Nupay
kasta, ibilangko a kaduak dagitoy
ta pangnamnamaak ida uray awan
emosion ken dida marikna ti mariknak.

Sapay koma ta iti maysanto manen nga aldaw,
agkikitakamto iti kasumbangir a suli ti lubong...



ITI SIROK TI SELLAG A BULAN
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com