Dagiti Nalapsat a Babbai a Mayarig iti Rosas

[Nabulod laeng ti ladawan a naaramat]

Gapu iti aramid a di magatadan,
inawitna ti maladaga iti saklolona
iti siam a bulan, tinaraonan ken impaayna
ti kaasi, sakripisio iti amin a panagbiagna;

Rambakantayo dagiti babbai
a naindaklan ti panagpuspusona-

addaanda iti ekstraordinario
a kababalin wenno aspeto
a naisupadi kadagiti sabali
a parsua, inted ti Dios kadakuada
ti maysa nga akem nga akmenda
kas iti kapateg ken panangtagikua
ti maysa a balitok a bukodda
a kinabaknang, bendision ken pakabigbigan-

Dagitoy dagiti nalapsat a babbai
a mayarig iti rosas a mangted iti pintas
ti apros ti lawag, agayamuom
ti banglo kas iti panangdennes
ti pakakontentuan ti maysa a pussuak

no sadino adda tiempoda nga agkatawa
ken mangisuro kadatayo nga agayat
tapno agbiag iti kinapusaksak ti biag
babaen kadagiti nasagraduan a sursuro.

Tengngel dagitoy a babbai ti nangato
a debosion, ti nabara nga arakup
ti dungngo, pateg ken ayat nga isuda
laeng ti makaammo ti pagnguddoanna.

Naragsak a Pannakarambak ti Aldawyo nga Inna!

Dagiti Nalapsat a Babbai a Mayarig iti Rosas
[Maisagut Kadagiti Amin nga Ina iti Pannakarambak ti Aldaw Dagiti Inna]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com