Pananglagip ti Aldaw ti Panagkallaysa

A Day in a Life: On this day, we bow ourselves before God. A reminisce of the
                      blessings of the past fifteen years...            

Our Wedding Day
July 14, 2001
St. Joseph Parish, Laoag City

TI wedding anniversary wenno anibersario ti panagkallaysa ket anibersario ti petsa ti aldaw a panagkallaysa. Napaadda dagiti tradidional a nagan mainaig iti kallaysa kas koma no: 50 a tawen manipud panagkallaysa maawagan iti "golden wedding anniversary," wenno iti simple nga awagna a "golden aniiversary." No 25 years maawagan iti "silver wedding anniversary," wenno "silver anniversary." No 60 years maawagan met iti "diamond wedding anniversary," wenno "diamond anniversary."

Tunggal tawen a panangrambak ti petsa ti aldaw ti panagkallaysa, adda dagiti sagut a/wenno mabalin nga ited iti kasimpongalan a mangirepresentar dayta a tawen. Kas koma iti umuna a tawen anibersario/anniversary, iti tradisional ken moderno a listaan a sagut/maisagut ket "papel/paper," "pagorasan/clock," "balitok/gold" [gemstone] ken "pansy" [flower].

Namuangayan daytoy a wedding anniversaries idi panawen ti Holy Roman Empire, no sadino a koronaan ti asawa a lalaki ti asawa a babai iti plata/deplata/pirak a korona a kaibatogan iti maika-duapulo ket lima a tawen nga anibersario ti kallaysa [silver anniversary]. Di nagbayag, nagbalin a komersial daytoy a tradision a nangitunda ti pannakanayon pay ti ad-adu nga anibersario a mangirepresentar ti sagut iti tunggal tawen.

Kadakami, rambakanmi ti maika-sangapulo ket lima a tawen ti panagkallaysa iti daytoy a tawen. Dagiti tradisional ken moderno a [mabalin a] sagut ket ti kristal, baso/sarming, relo, rosas, ruby wenno alexandrite, rhodolite garnet [a klase ti bato].

Ngem para kadakami, adda man wenno awan sagut tunggal maysa, ti nasken agari ti panagtalek, pammati, panagkinnaawatan, ti debosion a nakaikumitan bilang agasawa tapno ad-adda pay a rumubrob ti apuy ti pabelo ti patempateg ken ayat. Wenno iti ababa a pannao, pagarien [koma] a kanayon ti makuna a ROSE wenno R-espect, O-penness, S-ympathy ken E-mpathy iti tunggal maysa tapno mapalawa pay ti panangawat, kinatured ken responsibilidad[mi] iti pamilia- agkammayetkami a mangsaranget ti yablat ti dawel/pannubok ti panawen ken mangpasangbay ti naranraniag a masakbayan. 

Aywananmi ti *bunga ta isut' inspirasion. Padakkelen nga addaan sirib, ambision ken sirmata iti masakbayanna. Isuro iti panagbuteng ti Dios tapno mailiklik kadagiti pakaisungsongan nga aramid ti dakes. Ta ti puon, kukuana ti bunga. Ti bunga, agkunnot ti taraonna iti puon. Ti bunga isu ti parupa ti puon.

Kangrunaan ti amin, ti agnanayon a panagyaman ken panagtalek iti Dios kadagiti amin a bendision nga impaayna.

Ket iti daytoy maika-sangapulo ket lima a tawen ti panagdenna bilang agasawa, parayrayenmi pay ti apuy ti pabelo ti pateg ken ayat. Silmutanmi ti sabali pay a pabelo a mangrangrang ti pagnaan a mangasak ti dalan nga agturong iti masakbayan.

Agyamankami iti Dios!

[*Sofia Monique]

Rudy Ram. Rumbaoa/Monica M. Rumbaoa

Pananglagip ti Aldaw ti Panagkallaysa

Hulio 14, 2001

Iti Parokia ni San Jose

Siudad ti Laoag
www.samiwengkenayatnirudy.blogspot.com