Kunak Man...

[Nabulod ti ladawan a naaramat]


Ket wen, sakbay nga agngudo
ti tawen, padasek man a lagipen amin
dagiti nagpasarak iti daytoy nakiro
a lubong--no dagitoy man ket nasaktanak
wenno adda napasaktak; no dagitoy
ket ragsak wenno nangted nakana
a liday; iti tiempo ti pannubok/nakasuotak
wenno naglasatak; no adda man nagkurangak,
isu ti punnoak; no nagbalinak a nalupoy,
padasek agbalin a nagpigsa; no adda man
nagkurangak iti espiritual a banag
a maisupadi ken maisalungasing 
iti pagayatan ti Dios, dumawatak
pammakawan; no adda man
nakababalawak, dumawak iti despensa--
ta siak, taoak lang a kas kenka.

Ngem kangrunaan ti amin, agyamanak
iti Dios. Agyamanak Kenkuana iti laksid
nga inaramidko amin a kabaelak, dinak
binaybay-an. Pudno a managbasolak, 
ngem inyismagelko ti pammatik iti dapanko
tapno iti sadino man a papanak, adda
sadiay ti Dios ket silalagipak nga agnanayon
Kenkuana-- iti desdes ti nalikudak a kalman
ken ti panangasak ti agur-uray a masakbayan...




NARAGSAK A PANANGSARABO TI UMAY NGA UBING
A TAWEN KADATAYO AMIN!
Rudy Ram. Rumbaoa
3o, Disiembre 2o19
Wailuku, Maui
www.samiwengkenayatnirudy.blogspot.com