Makauma Met

[Nabulod ti ladawan a naaramat]




Kayatko met agbuya ti sabali
ngem awan sabali a mapili,
isu la nga isu ti bida
kasta met ti kontrabida.

Makauman a buyaen rupada
awan sa met mayat nga agartista
uray koma agparang a sinsinan bida, 
wenno ti kalabanna a kontrabida.

Wen, kayatko met agbuya
ti baro ken sabali a makita
ta pudno unay a makauma
arigna ti agsublisubli a plaka.

Kayatko ti agbuya ti sabali
tapno malinglingay inawisko a sangaili
numuna ket naggaput' adayo nga ili
ken adda met maestoriana no agsubli.

Kuna ngarud daytoy sangsangaili:
"Diak kayat kanayon a kastoy, Kaili,
no mabalin adda sabali a mabuya
uray aksion, komedi, drama no isut' adda."

Pudno di mailinged kaririknak nga agbuya
ta kasano aya isu la nga isut' turongen estoria,
agdaydayamudom la ngarud pada a makakita
di pay agpagusto ti bida ken kontrabida!





MAKAUMA MET [2oo6]
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com