Makipagrambak Iti Isasangbay ti Mannubbot

[nabulod ti ladawan a naaramat]


Kaimas turog dimo kayat agmulagat
Mapatit kampana dimo kayat malukag
Ngem awan mabalin sikat' agrubbuat
Makimisa iti simbaan, makipagrambak.

No dadduma kayatmo ti marurod
Kayatmot' agkukot ta sikat' nabannog
Kayatmo ipapas kawilen ni Kaingungot
Ngem awis daytoy ti Apo isut' masurot.

Siam nga aldaw tunggal agsapa
Amin nga umili inda agisagana
Daytoy karagsakan a paset ti Paskua
Ti mangpasangbay iti Anak ti Namarsua.

Kalpasan ti misa addan nakasagana
Tupig, puto bungbong iti igid ti kalsada
Nagbalinen daytoy a nakaugalian
Ramanan amin naidasar a makan.

Dagiti dadduma mapanda agkanta
Bumalaybalay tapno aginaldo awatenda
Anian a nagragsak, anian a rag-o ti marikna
Adda ayat iti puso, adda panagkaykaysa.

Kaimas man ti turog dika koma maruruod
Bay-am ti agkukot, bumangon 'ray sikat' nabannog
Awag ti kampana, indiam pay laeng ni Kaingungot
Inka makipagrambak iti isasangbay ti Mannubbot!





MAKIPAGRAMBAK ITI ISASANGBAY TI MANNUBBOT
Rudy Ram. Rumbaoa
Dagiti Koleksion a Daniw, Sarita, Kanta ken Dadduma Pay
www.samiwengkenayatnirudy.blogspot.com
*Immuna a naiposte iti Iluko.com