Filipinas

[Nabulod ti ladawan a naaramat]

 

Inaupaandaka tapno alisto a madadael, Filipinas,

Dagiti nagannak ilakoda dagiti annak a babbai

Agpaay iti agpatnag a pateg ti taraon dagiti lallaki.

Katawaan sabali dagiti mangibagi iti gobierno

Samsamenda ti baybaymo iti tengnga ti aldaw

Ngem ti presidente agkannat' kimmot pagkurnoanna.

Mapan ni Magdalena iti simbaan tunggal Domingo

Ngem agtamed kadagiti mammapatay-tao iti kalsada,

Awagandaka ti managsakit a pagilian ken magustoam

Nga iluan rugit ti sabali ket dagiti agtutubo pinekeda

Ayug ti pagsasao, nagikulada iti kudil tapno napudaw.

Nabaybay-an naruay nga arapaapda, Filipinas,

Adda kadi pay nabatbati a maipampannakelmo ita?

Dimo pay nabigbig nagekstra nga anakmo iti internasional 

A pelikula. Nalabit, saanmo pay nga am-ammot’ kadaraam

Nga iti konkurso-pabuya ti pakasaritaan dagiti Filipino

A makisalip, nadaruy ti dara nga agtartaray iti uratda--

Mangipakita ken mangpaneknek kadi a kualipikadoda?

Dimo sinuportaran ti chess player-mo agingga a sabali

Ti nagtagikua. Aniat’ maipannakkel-maipagtangsitmo

No dagiti tattaom paggaangawanda iti bukod a bagi?

.

.

.

.

.

FILIPINAS

Rudy Ram. Rumbaoa

www.samiwengkenayatnirudy.blogspot.com