Simeon

 

[Nabulod ti ladawan a naaramat]

Pinugas ti panawen dagiti baddek ti sakak kadagiti agsasanga
A tapoktapok a kalsada iti Barangay San Bernabe a nagnagnaak
Idi nga aldaw, sangapulo a tawenen ti napalabas; inakup kadin

Ti angin nga impalais iti di masinunuo a gangannaet a disso
Ta uray ti pinanawak nga ili a namulagatan-dimmakkelan, 
Diakon makita a paset iti mapa? Wenno siak ti nayaw-awan?

Nabungon iti aglawlaw kadagiti nagango a ruot, agrengngat 
Ti kinelleng iti awan maawat a danum, namaga ken kalbo
A buya dagiti arigna narolio a turod iti daya a mangap-apros
Kadagiti nayaplag nga ulep ti ngatuenna iti awan patingga
A lawa ti tangatang, agkakaiwara nga awan urnos dagiti
Nakapempen a garami iti sarusar a pumada ti nakusokuso
A buok; agwerwerret-agpulpuligos a mangngeg iti lapayag 
Ti kansion dagiti salaksak a partaan ti dakes a sumangbay.

Ngem pimmudno ti parparikna ta dinakiwasmo ti bukod
A dalan. Nagngudo, nalpasen sasaibbekmo. Nabuddak 
A malagip ti naganmo kadagiti tao a mangibilang kenka
A santo, iti lugar a nagtaudam—kasta unay dung-awda.

Saan a makaanay dagiti pasdek, rangtay ken kalkalsada 
A nabangon a pagrukodan bayat kaaddam iti poder 
Ti pakalaglagipan a patawidmo no di dagiti naimbag
Nga aramid a naimula iti nakem ti nagserbiam tapno
Maibilang a karamanka iti pakasaritaan ti pagilian.

Makipagtaengka itan iti darang ti daga a pakaipisokam
A makikammaysa ti bagi kadagiti ruot—ngem pinanawam
Ti nagkaadu a wara nga agingga ita, di pay naidalimanek.
Pagpiaanna, agsasarangkayo kada Ben ken Azon a kasta
Unay ar-arug-ogda a mangpasangbay kenka iti kaikariam.

Ngem sadino man ayanmo: agkalkallautang iti di-mailugar,
Ipakitam kaniak ti dalan tapno ammuek nga addaak iti husto
A nagtakderak a sika a nagbaniaga, a sika nga aningaas, sika
A saanen a sibabagi ken timmipon iti nabaknang a bangkag;
Timrarong ken nagkalatkat ti Hedera Helix a siitan a mula
Iti lapida ti pannakaimansayag ket iti alad a nangbangen 
Dagiti managridep, ipakitam dagiti dua a bisita kaniak
Nga agur-uray kenka iti sariping ti balay a paginanaam
Tapno mapnekak a mangmatmat ti lasag iti pisikal a bagi.
.

.

.

.

.
SIMEON
Daniw ni Domingo De Gasat/Rudy Ram. Rumbaoa

www.samiwengkenayatnirudy.blogspot.com