Puted a Daniw

daytoy ti dapo nga ared-ed ti rabii:

awan nabati iti panid ti pakasaritaan

ti nagpatnag no di ti panagadu ti babassit

a pangen dagiti barko iti nasulinek a lugar

ti taaw, kas da apuy a bula ken kulibangbang

nga agtatayab nga agbibiag a nakawaywayas 

a kaarngi iti uging a balikas a mangpigis

iti bagi ket mabriat ti ulo nga agpanunot.

saan pulos naisubli dagidi nagpukaw

nga aldaw, in-inut a pinugas ti panawen

karaman ti atiko a lupot-- awanen rimat

dagiti bituen iti law-ang a manglawag

ti dalan a kas met la kenka, magdalena,

a mayarig ti kalamiis ti agtennag a niebe

a linikudanen ti paskua ngem maipada 

ti liday ken bara ti arakupmo 

iti nagpanawan a tugot ti kuaresma...

.

.

.

.

.

puted a daniw

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]