Ti Biagko ti Ragsakmo

 

makasalibukag iti rikna bara ti aprosmo

a kas iti apuy a mangdarang ti barukongko

saan ketdi a manglimlimo ngem napudno

ti mariknak ti mariknam nga agaun iti puso

agsadagka man iti abagak ta baliksek

ti putar a daniw, lailok idingpilkot' agek

bay-annak nga aglemmes a manglansad kaipapanan

no ti biagko ti ragsakmo a kaibatogan

kukuam ket kuamto latta daytoy ayat

ta awan kapadpadmo nga agikut kaniak

saan laeng a balikas mangpennek maisawang

no la ket mapuros ti pudno a kalikaguman

ala umayka ta silmutan ken parayrayenta

apuy iti pabelo kari a mangiturong kadata

dita ipalubos a mapuyupoy-maiddep silawta

a mamagbalin a kalasag iti masakbayanta...

.

.

.

.

.

ti biagko ti ragsakmo

rudy ram. rumbaoa

samiwengkenayatnirudy.blogspot.com