Interumpiren

Daytoy a lugar maysa a tagtagainep,
managridep ti mangibilang a pudno.

Pagammuam umay ni Patay 
iti panagbannawag, ket mariing
ken agsiddukerka ti dimo ipagarup
nga iyaay ti nakana a leddaang.

Ngem naidumduma a klase 
ti tagainep, iladawannat' ranggas 
awan puot nga aramid ti ilusion 
ti agdama a panawen; saan a malaos 
ti mansayag iti ipapan sabali a biag--

Agbati ketdi.

Agtalinaed, masapul nga interumpiren.

'Yebkas amin panagkatawa, nasayud amin
a darikmat, aggartem ti lasag, mabriat 
ti abrigo, agbaliwda kas ti narungsot 
a leon--masapul a sangnguen.

Umay panagibales ti di mapakadaan 
nga oras, kas ti layanglayang wenno 
salaksak, tiraen ti pagamento ti likud 
kas iti panagay-ayam dagiti ubbing 
no anat' pagbanagan ti sabali;

Ditoy ammo ti maipapan pannakakugit.
Maikkat ti bukelbukel wenno ukel-ukel!

Daytoy makaulaw a tiempo a pagbiagantayo, 
kastoy ti pannakailadawanna:

    mapan maturog ti tao iti maysa nga ili,
a sadiay ti pagarupenna a pagnaedan ngem
matagainepna nga agnaed iti sabali a lugar--

   iti dayta a tagainepna, saanna a malagip nga
iti ili a pagturonganna isu a mismo ti katrena,
mamati ti realidad ti daytoy ili a natagainepna

Napno ti lubong iti klaset' pannaturog ken tur-og!

Iti labes ti tapok ti adu a marebba a siudad--
maurnos kas ti mayepyep a pannakalipat,
ngem nataengantayo. Namuangayantayo 
kas maysa a mineral. Limtuadtayo kas ti biag 
ti mula ken estado ti ayup, kalpasanna, 
kas nabiag a tao, ken kanayon a pananglipat
dagiti duog nga estado malaksid ti nasapa 
a panagrurusing no malagip 
ti panangtagibassit ti nagapuanantayo

Kas iti kinaganus ti panunot ti maysa nga ubing
iti gandatna a makasursuro. Kasta ti maysa
a maladaga no kasano a nutnotenna ti gatas
iti suso ti ina, ngem saanna ammo a pulos
ti sikreto ti tarigagayna nupay balinglingen
ti gagangay a karakteristiko ti panagutob.

Maiturong iti tao ti panagdur-as ti panawen, 
ket babaen ti daytoy, agimigrante ti kinasirib 
nupay kasla matmaturogtayo-- adda met laeng 
iti unegtayo ti pannakariing a mangiturong
ti atension wenno panggep ti tagtagainep,

ket dayta ti mabalinto a mangtikaw kadatayo
nga agsublisubli a mangtunton ti kinapudno.

.

.

.

.

.
INTERUMPIREN
Rudy Ram. Rumbaoa

samiwengkenayatnirudy.blogspot.com

[nabulod ti ladawan a nausar]