Ket wen, ita a Domingo de Ramos sakbay ti panaglaglagto wenno pannakapatit iti kampana ti simbaan no Sabado Gloria, aramidek manen a kas iti inaramidko itay napalabas a Kuaresma ti panangdalus iti pagtaengak ditoy Epbi.
Planok koma ngamin a makaykay ken madalusak manen dagiti rugit a naummong, nagapon ken wara ditoy Epbi a kangrunaan a pagliwliwaak.
Wen, iti daytoy a gundaway, bareng maibasurak wenno mapuorakton dagiti plastic kada tupperware kada dadduma pay a kita ti makairita a wara, dagiti sobra a bisti ken makasulek iti mata, dagiti nakikarruba [kampay idi], a ni kaano man, saan met, awan met naitedna[da] a pagsayaatan ti pannakilangen, wenno dagiti nakikabbalay nga awan met serserbina[da], dagiti lumned-tumpaw ti alintataona[da] nga agipaskil iti parupa ni Epbi iti pagtaengak nga awan met bugas ken kaipapanan ti tantanawtawenna[da]-- nga arigna[da] ampaw, dagiti awan kaeskanna a banag, dagiti mangurnguriro a mangunor-unor ti dalan iti akin-dalan-- a dida met ammo nga ibilang ti kinapateg ti maysa a pagayam, ken aminen a kiteb kada marabutit a peste ken sabidong iti pagtaengak nga Epbi, piman.
Nupay kasta, pagyamanak ketdi, a, dagiti pada a nanumo [iti pisikal a bagi wenno iti panagpampanunot, wenno ti kapampanunotanna(da)], dagiti manayon a mangiburay iti adal, dagiti managbuteng iti Dios, dagiti napakumbaba a dina ammo nga ilastog ti aniaman nga adda kenkuana[da], dagiti pudno a nangisit ti sikona, dagiti managsida iti saluyot, dagiti naanus ken napasnek a mangitandudo ken mangitag-ay ti bukod a pagsasao--- isuda ti pudno a kinabaknang ti agdama a panawen tapno di mapugas ti napuotan ken namulagatan a kultura a maipaima, maipalapayag ken maipamata a tawiden dagiti sumaruno a henerasion...
Ket wen, apaman a sumingising ti lawag ti init iti umuna nga aldaw ti sumaruno a lawas, namanamaek a maummongkonto aminen a basura sakbay a maibelleng ken mapuoran tapno maikkan ti nalawlawa nga espasio ti ganuat ti baro a biag...
Manipud ita, tinawen nga aramidek daytoy. Pagbalinek a nadalus tapno mabugaw dagiti di-katatawan kada al-alia nga agumok iti pagtaengak--- ken tapno maay-ayo ni Apong Epbi. Piman.
.
.
.
.
.
LITANIA: AGTULTULOY TI PANAGDALUS
Domingo de Ramos
Dom. 13 Abr. 2o25
Wai, Maui
samiwengkenayatnirudy.blogspot.com
[nabulod ti ladawan a nausar]
No comments:
Post a Comment