Adda italtalukatik dagiti matam
tunggal agsabatta iti dalan,
kasla adda kayatmo nga ibagasan
Makaabbukay iti rikna nga isemmo
a danggayan apagdillaw a kallidmo,
isuda man ti ray-aw a pakagutigotan
kenka, imnas, kasano nga inka liklikan?
Akuek Ladyheart a daytoy ket ayat
ta naidumdumat' bitek pusok-agganat,
arigmot’ nota ti musika iti barukongko
a mangyeg rag-o samiweng ti biagko
Ngem adda gundaway a mapaumelak
no gamdek ipudno kenka 'toy riknak,
masimbalud dilak a kasla agtukiad
bibigko narigat payen a maungap
Iti naminsan panagsabatta iti dalan
naragsakkayo ti lalaki a kaduam,
nagay-ayam panunotko diak mapatangan
ngem impudnom nga isut' asawam
Rumbeng a maputed innak panagarapaap
ta daytoy mariknak kenka di maikanatad,
diak kayat a siak ti puon ti pakarakrakan
ti natalna ken naragsak a pamiliam.
.
.
.
.
.
LADYHEART
Rudy Ram. Rumbaoa
naadaw ti paulo ti daniw iti maysa a blog iti Iluko.com "Ladyheart"
[c] 11.24.2007
[nabulod ti ladawan a nausar]
#ladyheart #italtalukatik #mingmingmingan #ibagasan #makaabbukay #gutigot #masimbalud #agtukiad #arapaap #maikanatad #rakrak
No comments:
Post a Comment