Dagiti Puted a Daniw

 

Aggunayak kadagiti kurba a pagnaan ti dara

Italmegko dagiti nagsarimaddeng a lalaem tapno

Mangngegda ti musika, rummuar ti tubbog ti bagi

Ket serkenna amin a bassit a lussok iti siudad, mangparnuay

Iti simple nga ayug a mangtiliw iti atension ti lapayag.

Agbaniagaak kadagiti lugar a diak pay napanan

Sadiay, awan ti nalawag a pagilasinan

Ken amin a balonko imetna ti nagkaadu a saludsod;

Ngem mabigbig ti pagdaliasatan babaen iti pagilasinan

Ti maysa nga ayamuom wenno maysa a kinabanglo,

Kas iti kudil ti ay-ayaten; mabigbig ti maris ti mata-

Ngem dinto pulos mabalingling wenno mapusipos...

.

.

.

.

.

naadaw iti maysa a paset ti daniw “panagbaniaga”

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]

Dagiti Puted a Daniw

inturongnak kadagiti bantay

ken dagiti nakaun-uneg a teppang

ti napintas a buya ti panagtennag

ti danum ti dissuor nga agturong

iti sentro ti lubong. ken wen,

nagalinggagetak gapu’t butengko

dagitoy a teppang a pumada iti amin

a misterio—pagsiddaawan, ngem

nakaay-ayat ti kinadatdatlagda.

ket ti kasumbangir a teppang

ti nalawa a bariwangwang,

naunnatda a kas ti lubid ti arpa

a maipalladaw iti bantay a kaarngi

ti rangtay a pagdaliasatan a maisilpo

iti agpada a sikigan dagiti teppang;

gapuna a nairut ti galut ti nabara

nga arakup ti panagpagayam kalpasan

a natupakan no mano a tawen ti nalawa

a giwang tapno maikkan gundaway

nga agsarakta ti daytoy nga aldaw

iti asideg ti karayan, iti asideg ti atep

ti lubong tapno ‘yawatmo dagita ima

ket kunam: “umayka, isurok kenka ti agsala.”

.

.

.

.

.

naadaw iti paset ti daniw “nakakaskasdaaw”

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]

Pakamakam!

 pakamakam:

kablaawak mammet dagiti saan nga inna, wenno dagitay dina pay napadasan ti nagbalin nga ina, dina panggep ti agbalin nga ina, dagitay agtalinaed lattan a balasang, balasang a nabaketan, singles, wenno dagiti maawagan iti ad-'others.' ala wen, "happy others day" met kadakayo!

rejoice, enjoy, rejoice! hehe!

.

.

.

.

.

ti la adda, no 11

samiwengkenayatnirudy.blogspot.com

[nabulod ti ladawan a nausar]

Ni Kaano Man Ket Saan a Makaanay

 

Ammok nga ammom kayat ti bibigko nga isawang

balikas a pagyaman kadagiti amin a naaramidam,

ngem kas da la tumatayab nga agkayabkab

nga agpatangatang-- agpukaw a kasla asuk

iti imatang ti adda't panunot dagus a malipatak

Kasano aya a maitedkot' naan-anay ken nalaus

a panagyaman sika a nakautangak, sika

a nangmuli't kinataok, nakataraonak, nangbayabay

panagdakkel, kasilpo't urat pagtarayan ti darak?

Tinagtagibinak manipud maladaga, sika

a nangilillili kaniak agingga a mairedepak,

ipaiddanak iti kama ket bosesmo ti mangpasardeng

sangitko; sika a silaw ti pagtaengan, sika a makaawat

makailawlawag kadagiti banag tapno maparagsak ti anak

Sika a nangasibay rubbuatko nga agturong eskuela,

adda liday ken ulimek nga agari iti panagmaymaysam

a kaawanko, ngem agrangrang manen rupam apaman

a makitam isasangpetko a sabten ken arakupennak

Sika a kasta unay anusna a Siak ti inka 'yun-una

nga uray palubosannak a masuot-- saktan, dangran

ti sabali ken riknak ti marurod, addaka a mangliwliwa

Asino't mangipinta ti kinangayed bullalayaw iti lubong

no mapno kadagiti nalpay nga arapaap, siasino

ti mangilawlawag kadagiti banag no awan met makita

ken maaprosan-- adda kadi balikas a mayataday

a mangsungbat? Natangken a kas iti katangken ti bato

dagiti saludsod ket amin a kayatko a baliksen

mariknak, ni kaano man ket saan a makaanay

Kasano aya ti wagas innak panagyaman iti pusom,

kadagiti ling-etmo, kadagiti luam, iti nasurok

sangpulo ribu a bambanag a naaramidam a pagsayaatak

iti no manon nga aldaw, bulan ken tawen ti naglabas?

Iti panangbaliwmo't kinataok, ti panangawatmo

dagiti nagkurangak, ti saanmo a pananggusto

kadagiti aramidko gapu ta isut' kayatmo,

inay-ayatnak latta a sidudungngo

Dika pulos nagsuko uray pay madanonan pagnguddoan

kinamasantingmo, addaka latta a mangipannakkel

kaniak-- sika a napudno a gayyemko iti agnanayon

Ala kitaennak. Miraem a naimbag ti kinaasinok ita.

Makitam kadi ti bagim kaniak, ti nagbanagak?

Amin a namnama ken arapaapmo, ti pigsam a saan

a makita ti sabali, nayallatiwda,

ket ti kangrunaan nga adda kenka; intedmo kaniak

Agyamanak, agyamanak, dagitoy ngatan ti kapintasan

a balikas a panangipeksak iti sagut ti biag--kenka Inak

Agyamanak iti amin a naaramidam a nagpaay kaniak--

agyamanak, Ina, gapu Kenka, naragpatkot' balligi a ragsakmo ita!

.

.

.

.

.

NI KAANO MAN KET SAAN A MAKAANAY

[Ken ni Adelindes]

Rudy Ram. Rumbaoa

samiwengkenayatnirudy.blogspot.com

Ayat [Ti Maysa Nga Ina]

kadagiti amin nga inna, dagiti agplanplano wenno mangar-arapaap nga agbalin nga ina, dagiti inna a pinanawan dagiti assawada ngem adda annakda, dagiti inna nga ina la ti ina ken dagiti aminen nga inna a mangrambak iti aldawda ita nga aldaw: "happy mother's day kadakay' amin!"

kasta met a kablaawak ti dungdungngoek nga ina, ni adelindes rumbaoa-- iti naragsak a panangrambak ti aldaw a naisangrat a para kadakayo nga inna. god bless you more, mom!

--

No dadduma, dimo mailawlawag

ti kaunegan a debosion nga ar-aramidem,

dagiti sakripisio ken panagibturmo;

kas man awan pagnguddoan,

awan panagimbubukod

Aramidem amin a pagsayaatan

ti familia, no mabalin, saan

a marpuog wenno awan mangitalaw

dayta nga ik-ikutam; naanuska,

Naasi ken sindadaan a mamakawan

kadagiti biddut a maaramid. Saanmo ketdi

padpadasen ti mapaay uray no mapuris

ti pusom ken panagriknam-- a kasla

saggaysa a mapirpirsay ti pasetna;

Mamatika ket mamatikanto latta

iti labes ti nagkaadu a pannakasuotmo

nga adda balligi a magun-odmo iti daytoy

nakiro a lubong ti pannakakondena,

ngem isut' karaniagan nga andap

Kenka kadagiti amin a napipintas

a banag a makitam bayat ti panagbiagmo,

wenno marikna, wenno kadagiti manmano

ken karkarma a masarakan ti klasena

a napateg a bato a kas iti diamante,

balitok wenno pirak; ngem

Ti ayatmo Ina, saan a gangandiong,

saan a peke no di ket pudno a naibaklay

kadagita abagam nga akmen a responsibilidad

ta amin dagitoy nalablabes pay ngem ti itudo

a pagrebbengan ti ayat ken dungngo

bilang Ina ta karitenna amin

a pannakailawlawag iti tunggal makita,

Maaprosan ken marikna, ngem agtalinaed

a sikreto a kas iti misterio ti nakaparsuaan,

wenno kas iti kinadayag ken kinangayed

a milagro a saanto pulos maawatan ti tao

ti kaipapananna-- ta maysa daytoy

nga ebidensia a pagsidsiddaawan manipud

iti kaasi ti Dios iti panangibagnosna ti lubong.

.

.

.

.

.

AYAT [TI MAYSA NGA INA]

Rudy Ram. Rumbaoa

samiwengkenayatnirudy.blogspot.com

[nabulod ti ladawan a nausar]

Ti La Adda

 

maysa nga aldaw, immasideg ti anak iti ama nga agbasbasa iti diario a nagsaludsod, “tatang, kasano a nayanakak?”

simmungbat ti ama iti bangbangir nga isem, “kinapudnona, barok, ibagak lattan kenka ta ammok a saludsodem dayta iti maysa nga aldaw,” kunana.  “ni nanangmo ken siak ket nagam-ammo iti chat room ti yahoo,” inrugi ti ama ti nagestoria. “kalpasanna, kiniddawko ken ni nanam babaen iti tulong ti e-mail nga agkitakami ti personal iti cyber-cafe. napankami iti adayo a lugar nga awan ti makaammo ken gino-googled-mi ti tunggal maysa. kalpasan a napnekkami iti inaramidmi, immannamong met la ni nanam nga in-download-ko ti hard drive-ko kenkuana. idi nakasaganaakon a mang-upload, nadiskobremi laengen a nasken koma a maysa kadakami ti nagusar iti firewall ngem gapu ta naladawen a naabisigmi, saanmin a naitalmeg ti delete button," binitin ti ama ti estoria sana kinita no aniat' reaksion ti anak sana kuna nga intuloy, "ket kalpasan laengen iti siam a bulan, maysa a banag ti nagparang a nag-pop-up a nagkuna: ‘you’ve got male!’”

na-gets-mo, kompad? hehe!
.
.
.
.
.
ti la adda, no 8
dagiti laeng leyendo ti makaawat iti daytoy, piman. hehe.
rudy ram. rumbaoa
samiwengkenayatnirudy.blogspot.com

[nabulod ti ladawan a nausar]

Kunak Man

dinak rukoden babaen ti kopa ta maysaak

a lames. sika ti bulan. dinak masagid, ngem 

ti lawagmo ti mangpunno iti taaw a pagnaedak....

.

.

.

.

kunak man

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]

 

Samiweng ken Ayat

siak, sika ken ti musika

.

.

.

.

.

samiweng ken ayat

rudy ram. rumbaoa

samiwengkenayatnirudy.blogspot.com

 

Agyaman

Adun dagiti aldaw, bulan ken tawen nagdaliasatan ken nakasuotam iti biag, ngem kitaem, natibkerka latta. Addaka latta iti sibayko. Iti sibaymi iti anakmo. Iti sibay dagiti mangipatpateg kenka, kadagiti gagayyem ken am-ammo. Iti rigat man ken nam-ay adda pay laeng a nakapalok ti panagtalek--ti pammatim saanto a marebba, mabual, mapekka wenno dalapusen ti aniaman a didigra ti naipakumit kenka nga akem ti biag.

Narangrang latta koma ti lawag nga itden ti silaw iti pagtaengan. Dawatek kenka a dimo ipalubos a mapundi. Dawatek ketdi a mataginayon ti natibker a pondasion. Ti napintas a panagkammayet ti silaw ken pondasion. Silaw a mangted lawag ken pondasion a mangpairut pay ti natibker a pagtaengan.

Agragsak, agrag-o ta nadanon manen sabali a pangal ti biag!

Ita a Mayo 4, dimo lipatan-- agyaman, agyaman iti Dios kadagiti bendision nga inka naawat ken awaten pay Kenkuana. Awan material a sagutko kenka no di daytoy a nanumo a daniw a sinangal ti pusok iti panagmaymaysak. Awatem, abisigem, imdengam...

Manen kenka a gayyem, kaayan-ayat ken kataktakunaynay ti biag iti agnanayon-- "NARAGSAK A PANAGKASANGAYMO!"

--

sika ti gayyemko a makaawat,

sika ti kaayan-ayat a makarikna,

sika ti kaingungot a makangngeg

iti yiki-ikkis a balikas ti pusok:

agrag-o, agragsak iti sabali manen

a nadanon a pangal ti biag!

kunak: sika ti asawak--

kataktakunaynay ti biag,

iti nam-ay ken rigat.

agpayso, sika ti sika

ti kaasitgan a gayyem

a di maum-uma a kadua.

sikat' kasilpo't aangsak

kabinnulig ti bagi

kadagiti adu nga arapaap.

sikat' kapatgan a sagut

napatpateg nga amang iti balitok

perlas wenno pirak.

sikat' kangrunaan

kadagiti amin a sagut,

ti nasudi a nirvana ti pusok--

ti kopa a paginumak

iti sam-it ni ayat.

ita a maikapat nga aldaw ti mayo,

dimo lipatan ti agyaman iti apo!

.

.

.

.

agyaman

rudy ram. rumbaoa

samiwengkenayatnirudy.blogspot.com

Sika [Ken ni Monica]

 

Agrag-o, agragsak ta nadanonan manen sabali a pangal ti biag!

Mayo 4, dimo lipatan- agyaman iti Dios. Agyaman kadagiti bendision nga inka naawat. Naragsak a panagkasangaymo kataktakunaynayko iti biag!

--

Impalais ti angin

Ti isemmo,

Nariknak dingpilna

Bayat a nagtapaw ti kalman--

Saanak nga Isu,

Saanka met nga Isu!

Ngem naglanga

A kristal ti tema

Ti nasapa a bigat.

Kaduam ti angin

Kaduam ti init

Kaduam ti bulan

Maysaka a datdatlag

Kadagiti matak.

Inton rabii agtugawka

Iti nalinak a danum

Ti refleksionko.

Inton rabii, ayatenka.

Inton rabii, denggem

Ken bilangem ti ritmo

Tunggal pitik ti pusok.

Mayarigka a kas

Maysa a mannanakaw

Nga agsamsam

Ti kinabaknang--

Kuam tunggal angesko,

Ti bagi ken kararuak...

Nupay kasta, addaka latta

Kadagiti palayupoy ti rabii.

Kenka ti kinatalinaay nga uni,

Maysa a perfekto,

Kukuam ti garawko.

Sika ti baybay,

Kenka aglangoyak a sitatalek.

Tengngelmo dagiti allon,

Dinak baybay-an a malmes

Idanonnak iti takdang.

Aywanam, dimo ipalubos

A masugatak iti aniaman

A pakadangrak ket yadayonak

Manipud iti nakana a leddaang--

Ket ti apges a mariknak,

Umay agpaeng dita pusom.

Isut' gapuna-=

Maysaka a linglingay

Sika ti isem

Sika ti apuy

Sika ti amin

Nga adda a makita

Dagiti matak.

Sikat' pakabuklan

Ti napintas a darepdep

Dagiti amin a madarepdep.

Mabalin a Sika

Ket Siak.

Mabalin a Sika

Ti Siak-

"Agingga a patay

Ti manggudas kadata..."

.

.

.

.

.

SIKA

[Ken ni Monica]

Rudy Ram. Rumbaoa

samiwengkenayatnirudy.blogspot.com

*o5.17.2o16

DAKAYO [Dagiti Nalapsat a Sabong ti Mayo]

gapu ta bulan ti mayo amin ti panagtaoda, pampaminsanekon a kablaawan dagitoy ipatpategmi a kameng ti familia iti panagkasangayda: maria corazon, mayo o1; monica, mayo o4; marlene agnes, mayo 1o ken mima, mayo 14.

---

Aramidyo di magatadan

Awit ti maladaga iti saklolo

Siam a bulan a nataraonan

Impaay ti kaasi, sakripisio

iti amin a panagbiagyo

Adda kadakayo ti ekstraordinario

A kababalin, addaan aspeto

A maisupadi kadagiti sabali

Inted ti Dios ti akem

Ah, kinabaknang ti galad

Bendision, parabur

Ken pangbigbigan dagiti annak!

Dakayo ti apros, lawag

Ti kaippasngay a bigat

A pakakontentuan ti pussuak

Nga agay-ayam agingga

A maituglep ti malem

Dakayo ti surotan ti dalluyon

Parnuayen-'yegdat' samiweng

A mangburak ti ulimek

Ti agdudungsa a rabii;

Ta dakayo ti agnanayon

Dagiti nalapsat a sabong

Ti Mayo, ti flores

Nga agayamuom banglo

Ti isem sakbay a mangngeg

Ti katawa, ti ayat

A mangiladawan kinapusaksak

Ti biag, pammateg ken dungngo

A dakayo laeng ti makaitudo

No kaano ti ragsak nga agngudo.

"ti ayat ti ina ti kakaisuna

a makaawat kaipapanan ti lua..."

.

.

.

.

.

DAKAYO [Dagiti Nalapsat a Sabong ti Mayo]

Rudy Ram. Rumbaoa

samiwengkenayatnirudy.blogspot.com

Kunak Man

ala 'mayka,

danggayannak

iwarakiwakta ti bin-i

iti kinelleng

tapno agtubo ti ayat--

ur-urayenka, dika

agsarimaddeng, lemmesennak

iti makabartek nga agek;

bay-am nga agalimpatokak

agingga a mapnek ti panunot

ken maidasay ti bagik

saakto agpasag

iti barukong ti daga.

.

.

.

.

.

kunak man

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]

Kunak Man

saan pulos nagungar

dagidi pimmusay nga aldaw...

.

.

.

.

.

kunak man

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]

Dagiti Puted a Daniw

 

dimo damagen kaniak no sadino 

ti ‘yan dagidi naregreg a narimat 

a bituen; awandan ta napasagda 

iti rabii ti abril ngem kitaem 

ta nagtugaw ken naurnosda

kadagita kurimatmat ti matam 

a nagbalin a pagtaenganda…

.

.

.

.

puted a daniw: dimo damagen

rudy ram. rumbaoa

samiwengkenayatnirudy.blogspot.com

[nabulod ti ladawan a nausar]