ni Rudy Ram. Rumbaoa
NATUNGPALEN ti nalayog nga arapaap dagiti dua a paboritotayo a kumakanta iti amianan, da Vhen Bautista a nabirngasan iti "Prince of Ilocano Songs," ken Melo Santiago, ti nalatak nga awagna a "The Mellow Songtress."
Wen, ta kasla man pinagtumpong ida ti panawen iti panakapaadda daytoy baro nga albumda a napauloan iti "Nalayog Nga Arapaap." Maibilang a bituen dagitoy dua a nalatak a kumakanta ta narimat ti naganda iti lubong ti musika. Adayon ti nadanonda no ti panagkanta iti ilokano ti pagsasaritaan. Saan la a dayta, versatile pay a singer da Vhen ken Melo ta kabaelanda ti agkanta iti Tagalog, English, ken dadduma pay a pagsasao.
Malagip a nangrugi ti careerda Vhen ken Melo nga agkanta kadagiti ilocano songs idi tawen 1990 iti nalatak a programa ti DWLW Radyo Budyong, ti "Bukros a Bukangkang," ken agingga ita, agpadpadada nga aktibo nga agirekrekord ken agkonkonsierto iti nadumaduma a paset ti Ilocos Region ken uray pay iti ballasiw taaw.
Itay nabiit, sangsangpet ni Melo a napan nagkonsierto idiay Hong Kong. Kasta unay ti ragsak ken pananggusto dagiti kadaraan a Filipino, nangruna dagiti pada a nangisit ti sikona ti sagut a kanta ni Melo kadakuada. Iti kaadda ni Melo sadiay Hong Kong, agpabuya iti tunggal aldaw ti Sabado ken Domingo babaen met laeng iti awis ti nagduduma nga organisasion dagiti Filipinos ti Hong Kong. Kadua ni Melo da Noraline Domingo ken Grace Saddam, ken dadduma pay a nalatak a kumakanta iti Ilokandia kadagiti pasken a pakaawisanda.
Iti biang ni Vhen, adu latta dagiti Filipino organizations iti Estados Unidos, nangruna iti Hawaii, ti mangawis kenkuana a mapan agpabuya. Kanayon met a kadkaduaen ni Mikaela Vien Canto Bautista, ti anak ni Vhen nga agtawen iti walo ken nayanak iti America kadagiti pakaawisan ni tatangna a pagpabuyaan. Kas met ken Vhen, nalaing nga agkanta ni Mikaela Vien iti ilocano songs.
Itay bulan ti Mayo iti daytoy a tawen, nagbakasion ni Vhen idiay Filipinas ket ditoy a nairekord ti umuna nga albumda ken ni Melo, ti "Nalayog Nga Arapaap." Para kada Vhen ken Melo, natungpalen ti arapaap a kayatda a tun-oyen babaen iti daytoy nga album ta nagserbi pay nga inspirasion kadagiti sabsabali a kumakanta ken pakalaglagipanda a dua iti panakarambak ti maika-duapulo a tawen nga anibersarioda a kas nalatak a singers iti ilocano songs.
Napauloan ti album iti "NALAYOG NGA ARAPAAP" gapu ta naibuksilan ken nailadawan iti tunggal kanta dagiti kapadasan ken arapaap ti biag. Ti "Idolo" a kanta ket maipanggep iti maysa a fan nga arapaapna ti agbalin a kas iti idolona a mangmangeganna iti radio. Ti kanta a "Caregiver" ket maisagut kadagiti amin a Filipinos- iti pagilian wenno iti ballasiw taaw nga agtartaraken kadagiti ul-ulila, naiwawa, managlilipat, dagiti nakapukaw iti pampanunot ken masaksakit a nataengan. Ditoy nga iladawan ni Filipino ti kinagaget ken kinaanusna nga agtrabaho iti kastoy a klase ti trabaho. Agpada a sinurat ti author dagiti dua a kanta.
Karaman iti album ti "American Dream" a maipanggep iti arapaap dagiti kadaraan a makapan iti America tapno rumang-ay laeng ti biagda. Sabali ti "Intuggelnan Ti Sippitna," ken "Agnanayonto't Ragsak," a kansion ti agkasar; sinurat ni Eliseo B. Contillo, dati a news editor ti Bannawag. Ti "Biagna a Naranga" ket kanta a pakasaritaan iti maysa a Filipino a nag-TNT iti America ngem nakiasawa't sabali tapno maliklikanna ti panakaideportar ken masuportaranna ti pamilia a pinanawanna idiay Filipinas. Ti "Pannubok, Abalayan," ket kanta a seknan ti arapaap dagiti agabalayan para iti nasayaat a pagbanagan dagiti annakda iti bangonenda a pamilia; ti "Isbo La Ti Inana;" ti "Beinte Kuatro Oras" a kanta ket maisagut kadagiti nagaget unay a kadaraan nga uray tallo a klase ti trabahoda iti maysa nga aldaw, agawaanda latta tapno sumayaat ti pagbanagan ti biagda iti masakbayan.
Inladawan ken insurat met ti lumatlatak a radio announcer ken nagbalin payen a singer iti Hawaii ita, ni Benny Guiang Rieta ti pudno a kapadasanna idi sangsangpetna iti Hawaii iti kanta a "Bagito a Hawayano" ta pasig a panagpasiar ken agawat iti maipapetpet kenkuana a doliar ti inaramidna, ngem idi napadasannan ti agtrabaho, "Agawidakon" kunana. "Agkikibintayo Koma" bersion ni Melo- kanta a maipanggep kadagiti Filipinos iti abroad ngem puera de los buenos, agari latta ti kinaapal ken kina-crab mentality a kunada. Adda met bersion ni Vhen iti nasao a kanta ngem sabali nga album ti nakaipalaonanna, ti Pinoy Power Talents a magatang metten iti merkado ken nadumaduma a pagtagilakoan dagiti Filipino stores iti Hawaii. Ti "Rimat Dagiti Bituen" a theme song ti makaray-aw a programa ni Freddie Boy Tan iti DWRS Commando Radio Vigan. Ti Rimat dagiti Bituen a programa ket pangtakkuatan ti talento ken kinalaing nga agkanta. Ken ti "Murmuray Iti Hawaii" ket theme song iti programa ni Benny Guiang Rieta iti Radio KPHI AM 1130, Honolulu, Hawaii.
Ti album ket umuna a proyekto ti "The Luck 7" Kompletos Rekados 4-UR Afternoon Delight Fan Club Hawaii nga idauloan da Carlos ken Pat Pucan, Myrna ken Eddie Villegas, Harold ken Carmen Villegas ken Mely Castillo. Isagutda pay daytoy nga album kadagiti supporters ti Kompletos Rekados 4-UR Afternoon Delight Fan Club Hawaii, kas pangdayawda kadagiti Filipino Radio Announcers nga id-iduloen ti kaaduan a kas ken ni "Mr. Saluyot" Benny Guiang Rieta, Ms. Edna "Beauty" Butay- ti Afternoon Delight, ken da Vhen Bautista ken Melo Santiago iti panangitantandudoda kadagiti tradisional a kanta nga ilocano iti ballasiw taaw. Ti album ket i-release ti Aquarious Records babaen iti panangimaton ni Buddy Cruzado. Amin a kanta ket inurnos ti nalatak a musical arranger ken singer iti Hawaii, Jun Velasco. Nairekord daytoy iti P.M. Recording Studio, Manila, a kukua ni German Moreno. Nairagpin iti album ti minus one nga inlay-in ni Danny Velasco. Ni Ruben Remperas ti recording technician.
Aw-awisen ti Fans Club dagiti nalaing a kumakanta ken kompositor tapno gundawayanda ti panakairaman dagiti kantada iti main-inaw a sabali a proyekto ti nasao a gunglo. Mabalin nga ipatulod dagiti demo iti P.O. Box Mililani, Hawaii 96789. Agsapsapul pay ti Fans Club kadagiti orihinal a komposision maipanggep iti tema ti "Panaggagayyem" ken "Ayat." No mapili ti maipatulod a komposision, manamnama a mairaman iti sumaruno a proyekto a kantaento da Vhen ken Melo, wenno dagiti madiskobre nga agbalin a singers ti grupo. Mabalin pay nga ipatulod dagiti putar a kanta iti awengrecords@yahoo.com.
Para kadagiti die-hard supporters ti Kompletos Rekados ken Afternoon Delight, addanto maangay a Wine & Dine no Octobre 24, 2009 iti Lance Kitchen Filipino Food idiay Wahiawa Loop, Honolulu, Hawaii. Kaam-ammo iti personal da Benny Guiang Rieta, Edna Butay ken ti Special Guest- ti mismo a Prince of Ilocano Songs, Vhen Bautista. Para iti ad-adu pay a detalye: tawagan daytoy a numero ti telepono [808] 554-9877, wenno sapulen ni Pat Pucan ken Myrna Villegas.
____________________________________________________________
