Naadaw iti paset ti DUA A DANIW

Dimo imbaga ti papanam,

dika nagpakada, awankan

idi naammuak nga inasakmo

ti desdes a kaikariam

Mailiwak met. Kailiwko

ti kaaddam koma. Binirokka

kadagiti naglabas a kalman

ta bareng kunak maitedna

ti sungbat ngem napaayak

Kayarigak ti nagsapul

iti napukaw a dagum

iti kagaramian ti ayatko

a maaprosan-makitaka;

nakas-ang ti nagtungpalan

No koma ayat ti makasalbar

idi nagbugsotka, intedko kenka

ti biag. Ti adda kaniak isu

ti tanda ti ayat nga intedmo

met laeng. Iti kasta, saannaka

a kinawit ti kumpay ni patay

Ngem saan kadi a kastoy

iti rueda ti biag? Adu a rason

ti di mailawlawag iti aglawlaw

gapu ngata ta Isu ti pagayatanna

Ngem inayatka iti kasta unay

uray nabayagkan a nakainana.

Ayatenka latta. Silalagipak latta.

Isu ti mandar ti panunot.

Isu ti marikna ti pusok,

adda latta lugarmo kenkuana

nga awan asinnoman a mabalin

a mangpunno ti pagkurangan—

iti nagbaetan no di Sika

Saanka a pimmanaw nga agmaymaysa.

Ti pasetko, nakipagaliwaksay met kenka

iti aldaw a nakipagtaengka Kenkuana...

.

.

.

.

.

naadaw iti paset ti DUA A DANIW

Rudy Ram. Rumbaoa

samiwengkenayatnirudy.blogspot.com

Naadaw iti paset ti Ababa a Sarita: AYAT TI MAYSA A LAKAY

“Kanayon kadi a sarungkaram ni Nana?” dinamag ni Mokong.

Nagtung-ed ti lakay.

“Binigat? Saanka a mabannog nga agkaraumay ditoy?” pinerreng ni Mokong ti lakay.

Saan a simmungbat ti lakay.

Nadlaw ni Mokong nga inwaras ketdi ti lakay ti panagkitana iti lawlaw.

“Iti daytoy nga edadko, barok, mabannogak met ti ar-aramidek iti asawak. Ngem no ut-utobem, saanmin a bukod nga agasawa ti tiempo. Dumtengto ti kanito a lak-amek met ti kasasaad ni baket. No saan, umay ti orasmi nga agasawa ket kawitennakami ti kumpay ni patay, awan ti mabalinmi,” kinunana. “Mabang-aran ti riknak no kanayonko a makita ken serbian ni Petra.”

Dinayaw ni Mokong ti sungbat ti lakay. Ket pudno, kas met ken ni Lakay Mundo, mapasamakto kenkuana ti kasasaad ti lakay. Saanna a bukod ti amin a panawenna ken agbalinto met a kas kadagitoy a nataengan. “Am-ammonakay’ pay ngarud ni Nana?” dinamagna.

Nagwingiwing ti lakay, “Uray dinak am-ammon ni Petra, am-ammok pay laeng. Wen, isu pay lang daydi dinungdungngok nga asawa,” kasla di sumngaw dagiti balikas nga agaun iti bibigna. “Ammok a dinakon malasin gapu iti sakitna, ngem saan a dayta ti tubeng tapno baybay-ak metten. Ita ta adda pay a biag, kayatko a siak ti mangasikaso kenkuana.”

Napespes ti asi iti puso ni Mokong ngem ad-adda manen a rinaemna ti lakay. Ita, maawatannan no kasano ti rigat ken pateg ti maysa a nataengan nangruna no dagitoy ket mabilbilangen dagiti aldawda iti lubong...

.

.

.

.

.

*naadaw iti maysa a paset ti ababa a saritak

AYAT TI MAYSA A LAKAY

Rudy Ram. Rumbaoa

www.samiwengkenayatnirudy.blogspot.com

[nabulod dagiti ladawan a nausar]