Ni Rudy Ram. Rumbaoa
pusok ti sinugatam
iti inka impalak-am,
ayatko kenka linipatmo
naggibusen dayta pategmo.
awanen daydi lailo
nagbalinak a sabidongmo,
bay-annak nga umadayo
no isu la unay ti kayatmo.
pusok ti nasugatan
iti gasat innak linak-am,
apayaunayen a ranggas
kasano kad' innak ipapas?
no diak kenkan maikari
iti saem a dinto agati,
sapay ta dika agbabawi
sagrapek tuok a mangnibi.
wen, pusok ti nasugatan
iti gasat innak linak-am;
diakon biagko malappedan
a suminan dita dennam...
[copyright.2007.by.rudy.ram.rumbaoa]
"Dumngeg kadagiti makaabbukay a kanta ti iloko a naputar ken nagaun iti kalikagum ti puso. Dagitoy ti naitalimeng iti kaunggan tapno maikkan anges ti sonata ti kalman ken maibinggas iti agdama a mamalukay iti irteng ti rikna. No maminsan, pitingenna ti kaunggan ket lukaisanna ti linabag ti kalman nangruna no mainaig ken ni Ayat. Agbalin met a nota ti tunggal anges ket sika a mismo ti mangtempla ti kuerdas ni Ayat iti kayatmo nga ayug tapno rummuar ti napimpintas a himno ken rima ti biag..."
Samiweng. Daniw. Sarita. Salaysay. Damdamag, Kdpy.
No comments:
Post a Comment