ni Rudy Ram. Rumbaoa
Kunak kenka, Maui,
A waknitakon ti panes
Tapno malapdan
Irurusing sabali nga ayat
A mangriing iti sugat
Iti ad-adda a pakasaktak.
Laglagipem, Maui,
Sangapulo ket dua a tawen
A binaludnak ti turaymo,
Ngem saan nga agnanayon
A baludnak ti pagayatam.
Iti inaldaw-aldaw a tinagibik ti liday
Napukaw ti nabatbati a pigsak,
Ngem laglagipem daytoy:
Saan a maymaysa ti aldaw
Kankanayon nga agpitik ti oras
Ket maipasngay ti baro a namnama
Kas iti panangdayas ti kaipasngay nga init
Ti naatap a sabong ti orkidia
Tapno agbukar manen...
Nalpasen ti napalabasta- ti kalman
Ket rumbeng koma a maitanemdan,
Bay-am a pumusay ti ayat
Tapno dung-awak ken pagbiagak.
*Iluko.com- Setiembre 6, 2007
[c]2007/by/rudyram.rumbaoa
__________________________
