ni Rudy Ram. Rumbaoa
Sika't pigsak
iti biag,
Sika't dalan
a pagnaak
ken silaw
a manglawag kaniak.
Sika't puon
ti amin a banag
taraon, kinasirib
ken amin a ragsak.
Kenka, agtalekak.
Sika
awan sabalin a pagtamedak.
Adda kad' pay sabali a kasapulak?
Mariknakon aglaplapunusan
nga ayatmo kaniak.
Sika ti Apo iti agnanayon
Sika't paggapuan ken panungpalan.
Wen, sindiakto nga agnanayon
ti pagsaingan
tapno makitak
dagiti unorek a dalan.
Bay-am nga asakek
dagiti adu a pannubok
diakto agamak,
awan pagbutngak- Sika't kalasag.
Idawatko Kenka, O Apo
a punnoennak
ti namnama a mapabaro,
tapno dagiti pagayatam
maiburayko:
"ti ayat a para iti kaaduan."
*[Aydot.com- Hulio 1, 2007]
[c] 2007.by.rudyram.rumbaoa
____________________________
