ni Rudy Ram. Rumbaoa
Rumimat-rimat dagiti silaw
a naipaturong iti entablado
a nagtakderam. Amin a mata,
kenka ti nakaimatang.
Natibong ti sipsipat tunggal
malpas ti maysa a kansion.
Di mauma nga aggilap dagiti
kamera nga agala iti ladawam.
Uray la gumgumluong
ti lugar a pagpabuyaam gapu't
kinapigsa a panagtokar ti orkestra.
Kalpasan ti tallo nga oras a pabuya,
di magawidan dagiti tattao ti umasideg kenka.
Otograpo nga awan sardayna, wenno
pictorial taking, video clip ken dadduma pay.
Di latta agsardeng ti sipsipat tunggal ipayapaymo
dagiti imam kadagiti tattao kas pangsubadmo
iti ragsak a naipaaymo kadakuada. Tira latta ti
sipsipat, panagdir-i ken ikkis ti ragsak.
Iti aringgawis ti balligim, ita a mapaneknekam
nga adu ti agdayaw, agrukbab ken mangayat
kadagiti kantam. Napaangeska ti nauneg ket
timmangadka. Kunam iti bagim: "Nalatakka unayen."
Iti likudan ti telon a nagtakderam, napasenaayka.
Ditoy nga entablado ti immuna a nangipasngayam
ken nakangngegan ti musika. Wen, musika no apay a
tangtangatedendaka ita. Ket iti maminsan pay,
tinangadmo ti langit, napaisemka idi
makitam dagiti bituen a naibalangat sadiay...
[copyright 2006] by rudyram.rumbaoa
___________________________________
