ni Rudy Ram. Rumbaoa
Ay wen, Kurdapya, pumanawka
iti sidongko dinak koman singaen, ala,
Ta nabayag idin a sisiimenka
Napukawen ti anus ken pasensia.
Wen Kurdapya, adaywannak, ala,
Tapno mabang-aran metten 'toy rikna,
Ibagam idi a sabidongak kenka
Waswasemon ngarud ti nagkinnarianta.
Diak met dagmel tapno ikutannak latta
Tapno bukodam ti ragsak a dimo kukua,
Diak met bulsek tapno diak makita
Aramidmo a paggaayatan ti dadduma.
No kunak, adaywannak, Kurdapya
Ta ginibusakon ti nagbaetanta,
Uray no naglapunosan ti ayatko kenka
Ibabawik itan ta dinakon kukua.
Ibagam idi a siak ti inka samsam-iten
Ngem gayam nagbalinak nga inka papaiten,
Ta no koma ammok a kastoy ti nagbanaganna
Diak koman pinagbayag daytoy ayan-ayatta.
Ita ta nasapa pay, Kurdapya
Adaywan, panawannak kunak kenka,
Tapno di agleddaang pay daytoy riknak
Ken diak ay-ayen ti agbalin a gasat!
copyright 2006 by rudyram.rumbaoa
_________________________________
