Ladyheart

Ni Rudy Ram. Rumbaoa




Adda italtalukatik dagiti matam
tunggal agsabat ta iti dalan,
matiliwanka innak mingmingmingan
kasla adda kayatmo nga ibagasan.
Dagiti makaabbukay nga isemmo
a danggayan ti apagdillaw a kallidmo,
isuda man ti ray-aw a pakagutigotan
kenka, Imnas, kasano nga inka liklikan?

Akuek Ladyheart a daytoy ket ayat
ta naidumduma't bitek pusok-agganat,
arigmo't nota ti musika iti barukongko
a mangyeg samiweng kundiman ti biagko.
Ngem adda gundaway a mapaumelak
no gamdek ipudno kenka 'toy riknak;
masimbalud dilak a kasla agtukiad
bibigko narigat payen a maungap.
Iti panagsabatta iti dalan ti naminsan
naragsakkayo iti lalaki a kaduam,
nagay-ayam panunotko diak mapatangan
ngem impudnom nga isut' asawam.

Rumbeng a maputed innak panagarapaap
ta daytoy a rikriknaek kenka di maikanatad,
diak kayat a siak ti puon ti pakarakrakan
ti natalna ken naragsak a pamiliam.

*[Naadaw iti Aydot.com- Nobiembre 24, 2007, iti Blog ni Lei]
[copyright (c) november 24, 2007 by rudy ram. rumbaoa]
____________________________________________________________