Sika ti Apo a Pagbiagak

Ni Rudy Ram. Rumbaoa



Siak daytoy: kaarigko't pitak
naigamer iti babak,
iti basol a namulagatak
iti lunod a nagtaudak.
Ngem agbabawiak
no rebbengna nga agpakawanak
iti biddut a naaramidak,
gapu ta Sika ti Apo, ti pagbiagak...

Impaaymo kaniak
idi mawaw ken mabisinak,
ti ubbog ti biag
taraon 'toy kararuak.
Amin dagitoy napnekak
ta linemmesnak iti ayat!

Ket iti panakaidalebko,
binangonnak.
Iti panakasugatko,
inagasannak.
Iti panakatnagko,
sinippawnak-
kenka Apo,
Sika ti pigsak!

Kinibinnak,
Indalannak.
Sikat' apuy
a nanglawag
iti pagnaak.
Sika't kalangtayak
iti sadinno a papanak
tapno tunggal addang
diakto maiyaw-awan.

Iti panakawawko,
iti panakabisinko,
iti panakadalebko,
iti panakasugatko,
iti panakatnagko,
maymaysa laeng ti turongko-
kenka Apo,
ti kamangko!

*[Aydot.com- Agosto 26, 2007]
_____________________________