Ni Rudy Ram. Rumbaoa
Nadagaangen, Mayo,
kas kabara ti pul-oy
nga iyapros ti angin
ti panagpakadam kaniak.
Kaano laeng daydi
ngem kitaem, imbatim
bisibis a mangdameg
ken nangpasantak
ti manglaylayen a sabong
nupay natikagan
ti nabayag a tiempo
ta mariknak daytoy:
nagbalinka a pasetko
iti tallo pulo ket maysa nga aldaw
a kaaddam kaniak.
A,
agbukar ken agadiwara
ti banglom kas maysa
a naatap a sabong ti orkidia
a napukawan ti namnama
a gapuanan ti pananglipat
ti naulpit a gasat...
Wen, Mayo,
iti panagpakadam iti sidongko,
ammok nga agsublikanto manen
tapno isangbaymo ti ad-adu pay
a kaipapanak kenka
ti maris ti kaipapanam kaniak
Iti panaglantip ti dalanta.
[CR.2008.by.rudyram.rumbaoa]
_________________________
No comments:
Post a Comment