Ni Rudy Ram. Rumbaoa
Makasalibukag rikna ti bara dagiti aprosmo
a kas iti apuy a mangdarang ti barukongko
saan ketdi a manglimlimo ngem daytoy napudno
ti mariknak ti mariknam nga agaun dita puso.
Agsadagka man iti abaga ta balikasek
ti putar a daniw, lailok, idingpilkot' agek;
bay-annak nga aglemmes a manglansad kaipapanan
no ti biagko ti ragsakmo a kaibatogan.
Kukuam ken kuamto latta 'toy ayat
ta awan kapadpadmo nga agikut kaniak
saan a mapaneknekan tunggal balikas a maisawang
no la ket di mapuros ti pudno a kalikaguman.
Ala umaykan ta silmutan ken parayrayenta
ti pabelo't kari a mangsalinong kadata
dita ipalubos a mapuyupoy-maiddep ti silawta
a mamagbalin a kalasag iti masakbayanta.
[CO.2008.by.rudyram.rumbaoa]
__________________________
No comments:
Post a Comment