Bay-am

Ni Rudy Ram. Rumbaoa



Bay-am
Biagek iti lagipmo
Daydi ayat
A linipatko.
Palusposak ita
Ti nailibay a kalman
A nakalipatan nagkarian.
Kunak:
Lipatek panaginnadayo
Iti kaunggak
Palubosak ti agdama...
Bay-annak
A tumpuarak manen
Iti maminsan pay a gundaway
Kadagiti in-inawem nga arapaap.
Wen Bay-annak
Nga agbiag iti sidongmo
Ket agbiagka kaniak
Uray no maminribu a pumusayak
Itanemnak iti kaunggam...
Maminribu met a maipasngayak.

[CO.2008.by.rudyram.rumbaoa]
____________________________