Saan A Rumbeng

Ni Rudy Ram. Rumbaoa




Adda ibagasan dagiti perrengmo, Charisa,
Mariknak ti umel a balikas iti bibigmo
A maipalais a mangdingpil kadagiti bibigko;
Kapnekak nga adda inka ipaawat
Ta agayus a kas diro ti kasam-it
Dagiti isemmo a manglemmes kaniak.
A, kayatko nga ikidem dagiti matak
Tapno diak makita ken maitappuak
Iti gayunggayong a pakairuboak,
Ngem nabilegka a manguksob ti kinataok
Ket in-inutennak nga isebba iti pagayatam-
Tapno maparmek ti kinalalakik
Ket agari kaniak ti kinarukop ni Adan.

Ngem biddut dagitoy nga appanmo kaniak
Ta agbanag laeng nga eppes ti dawa
Ti riknak
Ti riknam
Ti makitak kenka
Ti makitam kaniak
Tapno laeng maipaayan
Ti sungbat ti yas-asug
Ti gartem ti lasag-

Saan a rumbeng a mabulosan
Dagiti puso nga agikut iti sabali a ragsak
No addan agtagikua kadagitoy...

[CO.2008.by.rudyram.rumbaoa
________________________